भारत विरुद्ध ऑस्ट्रेलिया यांच्यातील पाच सामन्यांच्या कसोटी मालिकेसाठी चाहते खूप उत्सुक आहेत. टीम इंडियाचे खेळाडू पर्थमध्ये आठवडाभरापासून सराव करत आहेत. या मालिकेतील पहिला सामना पर्थमधील ऑप्टस स्टेडियमवर होणार आहे. या सामन्यासाठी भारतीय संघ पूर्णपणे सज्ज झाला आहे. सामन्याच्या एक दिवस आधी म्हणजेच आज 21 नोव्हेंबरला भारत आणि ऑस्ट्रेलिया या दोन्ही संघांच्या कर्णधारांनी पत्रकार परिषद घेतली आणि त्यादरम्यान दोघांनी अनेक मोठे खुलासे केले. मालिकेतील पहिल्या सामन्यात टीम इंडियाची धुरा कर्णधार जसप्रीत बुमराहच्या हाती आहे. खरंतर, रोहित शर्मा नुकताच वडील झाला आहे, त्यामुळे तो ऑस्ट्रेलियाला जाऊ शकला नाही.
भारतीय क्रिकेट संघाच्या प्लेइंग 11 बद्दल बोलताना जसप्रीत बुमराहला पत्रकार परिषदेदरम्यान विचारण्यात आले की, मालिकेच्या पहिल्या सामन्यात टीम इंडियाचा प्लेइंग 11 कसा असेल? यावर बुमराहने हसतमुखाने उत्तर दिले आणि सांगितले की, टीम इंडियाची प्लेइंग11 ठरली आहे. मात्र, याचा खुलासा तो उद्या म्हणजेच 22 नोव्हेंबरला सामन्याच्या दिवशी करणार आहे. टीम इंडियाचे काही स्टार खेळाडू मालिकेतील पहिल्या सामन्याला मुकणार आहेत. ज्यामध्ये रोहित शर्माशिवाय शुबमन गिलचेही नाव आहे. मात्र बुमराहने याबाबत कोणतेही विशेष अपडेट दिलेले नाही.
मालिकेच्या पहिल्या सामन्यात काही खेळाडू टीम इंडियासाठी पदार्पणही करू शकतात. त्या खेळाडूंमध्ये नितीश कुमार रेड्डी, हर्षित राणा यांच्या नावांचा समावेश होऊ शकतो. बुमराहने पत्रकार परिषदेत सांगितले की, टीम इंडियाच्या युवा खेळाडूंनी या मालिकेदरम्यान मोठ्या जबाबदाऱ्या स्वीकाराव्यात अशी माझी इच्छा आहे. बुमराहने असेही सांगितले की, या मालिकेतील पहिल्या सामन्यात तो कर्णधार होईल हे माहित नव्हते. पण ऑस्ट्रेलियात आल्यानंतर संघ व्यवस्थापन आणि प्रशिक्षकाने सांगितले की रोहित शर्मा पहिल्या सामन्याला मुकणार आहे. अशा स्थितीत त्याच्याकडे कर्णधारपदाची जबाबदारी देण्यात येत आहे.
ऑस्ट्रेलियाविरुद्धच्या पहिल्या कसोटीत टीम इंडियाची संभाव्य प्लेइंग11
यशस्वी जयस्वाल, केएल राहुल, विराट कोहली, देवदत्त पडिक्कल, रिषभ पंत, ध्रुव जुरेल, नितीश कुमार रेड्डी, रविचंद्रन अश्विन, जसप्रीत बुमराह (कर्णधार), मोहम्मद सिराज, प्रसीध कृष्णा, हर्षित राणा
हेही वाचा-
भारतीय कसोटी इतिहासात घडणार मोठा चमत्कार, जयस्वाल मोडणार सर्वात मोठा विक्रम
“थोडेसे ज्ञान तुमच्या भविष्यसाठी…”, संजय मांजरेकरांच्या ‘त्या’ वक्तव्यावर मोहम्मद शमीची तिखट प्रतिक्रिया
IND VS AUS; ऑस्ट्रेलियात भारताविरुद्ध कांगारुंचा दबदबा, असा आहे हेड टू हेड रेकाॅर्ड
