बॉर्डर-गावस्कर ट्रॉफी 2024-25 साठी आता अवघे काही तास शिल्लक आहेत. 22 नोव्हेंबरपासून पर्थ येथे खेळल्या जाणाऱ्या ऑस्ट्रेलिया दौऱ्यावरील पहिल्या कसोटी सामन्यासाठी टीम इंडिया जोरदार तयारी करत आहे. कर्णधार रोहित शर्मा पहिल्या कसोटी सामन्यात खेळु शकणार नाही. अशा परिस्थितीत फलंदाजीची संपूर्ण जबाबदारी विराट कोहलीच्या खांद्यावर असेल. रोहितच्या अनुपस्थितीत चाहत्यांना पहिल्या कसोटीत विराट कोहलीकडून मोठ्या खेळीची अपेक्षा असेल. ज्याची बऱ्याच दिवसांपासून प्रतीक्षा आहे.
पर्थ कसोटीदरम्यान विराट कोहलीला मोठा विक्रम करण्याची संधी असेल. खरंतर, विराट कोहलीचा ऑस्ट्रेलियाविरुद्धच्या कसोटी सामन्यात उत्कृष्ट रेकॉर्ड आहे. कोहलीने ऑस्ट्रेलियाविरुद्धच्या 24 सामन्यांच्या 44 डावांमध्ये 47.48 च्या सरासरीने 2042 धावा केल्या आहेत. ज्यात त्याने 8 शतके आणि 5 अर्धशतके केली आहेत. विराट कोहली ऑस्ट्रेलियाविरुद्ध कसोटीत सर्वाधिक धावा करणारा 5वा खेळाडू आहे.
पर्थमधील पहिल्या कसोटी सामन्यात विराट कोहलीने दोन्ही डावात एकूण 102 धावा केल्या, तर तो दोन दिग्गज भारतीय फलंदाजांचे विक्रम मोडेल. पहिल्या कसोटी सामन्यात 33 धावा करून कोहली ऑस्ट्रेलियाविरुद्धच्या कसोटीत सर्वाधिक धावा करण्याच्या बाबतीत चेतेश्वर पुजाराला मागे टाकेल. ऑस्ट्रेलियाविरुद्धच्या कसोटीत पुजाराच्या नावावर 2074 धावा आहेत. एवढेच नाही तर पुजारानंतर कोहलीला दिग्गज राहुल द्रविडलाही मागे टाकण्याची मोठी संधी असेल. कोहली द्रविडच्या धावसंख्येपासून फक्त 101 धावा दूर आहे. द्रविडने ऑस्ट्रेलियाविरुद्ध 54 कसोटी डावात 2143 धावा केल्या आहेत.
ऑस्ट्रेलियाविरुद्धच्या कसोटीत सर्वाधिक धावा करण्याचा विक्रम सचिन तेंडुलकरच्या नावावर आहे. सचिनने 74 कसोटी डावांमध्ये 3630 धावा केल्या आहेत. ज्यात 11 शतके आणि 16 अर्धशतकांचा समावेश आहे. मात्र, सचिनचा हा विक्रम गाठण्यासाठी कोहलीला अजून थोडी वाट पाहावी लागणार आहे.
कसोटी क्रिकेटमध्ये ऑस्ट्रेलियाविरुद्ध सर्वाधिक धावा करणारा भारतीय फलंदाज
सचिन तेंडुलकर- 3630 धावा (74 डाव)
व्हीव्हीएस लक्ष्मण- 2434 धावा (54 डाव)
राहुल द्रविड- 2143 धावा (54 डाव)
चेतेश्वर पुजारा- 2074 धावा (45 डाव)
विराट कोहली- 2042 धावा (44 डाव)
हेही वाचा-
IND VS AUS; स्पेशालिस्ट ओपनरशिवाय पहिली कसोटी खेळणे टीम इंडियाला महागात पडणार?
ऑस्ट्रेलियाविरुद्धच्या वनडे मालिकेसाठी टीम इंडियाची घोषणा, या खेळाडूकडे संघाची धुरा
पाकिस्तान संघाच्या नावावर मोठा कलंक, टी20 सामने हरण्यात प्रथम क्रमांक