भारत विरूद्ध इंग्लंड यांच्यात पाच कसोटी सामन्यांची मालिका खेळली जात आहे. तिसऱ्या कसोटीत इंग्लंडने एका रोमांचक सामन्यात भारतीय संघाचा 22 धावांनी पराभव केला आणि मालिकेत 2-1 अशी आघाडी घेतली. आता तिसरी कसोटी जिंकल्यानंतर इंग्लंड संघासाठी एक वाईट बातमी आली आहे. दुखापतीमुळे शोएब बशीर संपूर्ण कसोटी मालिकेतून बाहेर पडला आहे. त्याच्या जागी अजून कोणाची निवड झाली नाही.
भारताविरुद्धच्या तिसऱ्या कसोटी सामन्याच्या पहिल्या डावात रवींद्र जडेजाचा झेल घेण्याच्या प्रयत्नात त्याच्या बोटाला दुखापत झाली. यानंतर तो मैदानाबाहेर गेला आणि त्याची ओव्हर जो रूटने पूर्ण केली. पहिल्या डावात त्याने 14.5 षटके टाकली. त्याने 59 धावा देऊन एक विकेटही घेतली. यानंतर, दुसऱ्या डावात, जेव्हा इंग्लंड संघाला विकेट मिळत नव्हत्या, तेव्हा त्याला उशिरा मैदानावर बोलावण्यात आले.
दुसऱ्या डावात रवींद्र जडेजा आणि मोहम्मद सिराज यांनी 10 व्या विकेटसाठी 23 धावांची भागीदारी केली होती. त्याने सिराजला बाद केले तेव्हा भारतीय संघ विजयापासून 22 धावा दूर होता. इंग्लंडला विजय मिळवून दिल्यानंतर आता तो बाहेर आहे. त्याच्या बोटात फ्रॅक्चर झाले आहे. या कारणास्तव, तो पुढे खेळू शकणार नाही.
शोएब बशीर फक्त 20 वर्षांचा आहे. त्याने 2024 मध्ये इंग्लंड संघासाठी कसोटी पदार्पण केले. त्यानंतर, त्याने 19 कसोटी सामन्यांमध्ये 68 विकेट्स घेतल्या आहेत, ज्यामध्ये चार वेळा पाच विकेट्स घेण्याचा समावेश आहे. प्रथम श्रेणी क्रिकेटमध्येही त्याचा रेकॉर्ड उत्कृष्ट आहे. त्याने 34 प्रथम श्रेणी सामन्यांमध्ये 87 विकेट्स घेतल्या आहेत.
