यंदाच्या टी-२० विश्वचषक अंतिम सामन्यात, टीम इंडियाच्या टॉप-ऑर्डर फलंदाजांनी न्यूझीलंडच्या गोलंदाजांना चांगलेच बडवले. अंतिम सामन्यात टीम इंडियासाठी तीनही टॉप-ऑर्डर फलंदाजांनी अर्धशतके झळकावली. या सामन्यात भारतीय संघाने २०० धावांचा टप्पाही ओलांडला. यासह, टीम इंडियाने टी-२० विश्वचषक अंतिम सामन्यात आपल्या स्फोटक फलंदाजीने अनेक विक्रम प्रस्थापित केले आहेत. टी-२० विश्वचषक अंतिम सामन्यातील ही सर्वोच्च धावसंख्या आहे.
टी-२० विश्वचषक अंतिम सामन्यात टीम इंडियासाठी अभिषेक शर्मा, संजू सॅमसन आणि इशान किशन यांनी पन्नासपेक्षा जास्त धावा केल्या. टी-२० विश्वचषक इतिहासात पहिल्यांदाच एखाद्या संघाच्या टॉप-थ्री फलंदाजांनी अर्धशतके झळकावली आहेत. असा पराक्रम यापूर्वी कधीही झालेला नाही. या सामन्यात सॅमसनने ४६ चेंडूत ८९ धावा, अभिषेक शर्माने २१ चेंडूत ५२ धावा आणि इशानने २५ चेंडूत ५४ धावा केल्या.
या सामन्यात टीम इंडियाने १५ व्या षटकात २०० धावांचा टप्पा ओलांडला. टी२० विश्वचषक अंतिम सामन्यात एखाद्या संघाने २०० धावांचा टप्पा ओलांडण्याची ही पहिलीच वेळ आहे. प्रथम फलंदाजी करताना टीम इंडियाने ५ विकेट गमावून २५५ धावा केल्या. टी२० विश्वचषक अंतिम सामन्यातील ही सर्वोच्च धावसंख्या आहे. टी२० विश्वचषक इतिहासातील ही तिसरी सर्वोच्च धावसंख्या आहे. पुरुषांच्या टी२० मध्ये भारतीय संघाने २५० धावांचा टप्पा ओलांडण्याची ही सातवी वेळ आहे.
न्यूझीलंडविरुद्धच्या अंतिम सामन्यात टीम इंडियाने प्रथम फलंदाजी करताना २० षटकात ५ विकेट गमावून २५५ धावा केल्या. सॅमसन, अभिषेक आणि इशान व्यतिरिक्त, शिवम दुबे आणि हार्दिक पंड्या यांनीही खालच्या फळीत महत्त्वपूर्ण खेळी केली. हार्दिकने १३ चेंडूत १८ धावा केल्या, तर दुबेने ८ चेंडूत ३ चौकार आणि २ षटकारांसह २६ धावा केल्या.
