गौतम गंभीर इतिहास रचणार? रवी शास्त्री, राहुल द्रविड यांनाही नाही जमलं, ते करून दाखवण्याची संधी!

Gautam Gambhir: भारत आणि इंग्लंड यांच्यातील 5 सामन्यांच्या कसोटी मालिकेतील दुसरा सामना बर्मिंगहॅमच्या एजबॅस्टन स्टेडियमवर खेळला जाईल. (India vs England 2nd Test) हा सामना 2 जुलैपासून सुरू होणार आहे. भारतीय संघ लीड्समध्ये खेळलेला पहिला कसोटी सामना हरला आहे, त्यामुळे इंग्लंडचा संघ या 5 सामन्यांच्या कसोटी मालिकेत 1-0 ने आघाडीवर आहे. पण जर भारताने एजबॅस्टनमध्ये हा कसोटी सामना जिंकला, तर केवळ मालिकेत 1-1 अशी बरोबरी साधणार नाही, तर या विजयाने भारतीय संघाचे मुख्य प्रशिक्षक गौतम गंभीर एक असा इतिहास रचतील, जो ना विराट कोहलीच्या नेतृत्वाखाली रवि शास्त्रींना साध्य करता आला, ना राहुल द्रविडला प्रशिक्षक असताना हे यश मिळवता आले. (Gautam Gambhir coach history)

भारत आणि इंग्लंड यांच्यात एजबॅस्टन स्टेडियमवर आतापर्यंत 8 सामने खेळले गेले आहेत, त्यापैकी 1 सामना अनिर्णित राहिला आहे. तर भारतीय संघाला 7 वेळा पराभवाचा सामना करावा लागला आहे. इंग्लंडला भारताकडून या मैदानावर कधीही पराभव पत्करावा लागलेला नाही. त्यामुळे गौतम गंभीरच्या संघासमोर आव्हान आहे की, त्यांनी हा सामना जिंकावा आणि मालिकेत 1-1 अशी बरोबरी साधावी. (Edgbaston Test match records)

इंग्लंडविरुद्धच्या दुसऱ्या कसोटी सामन्यात जसप्रीत बुमराहच्या खेळण्याबाबत अनिश्चितता कायम आहे. भारतीय संघाने यापूर्वी सांगितले होते की, बुमराह त्याच्या फिटनेसमुळे 5 पैकी फक्त 3 सामनेच खेळू शकेल. परंतु बुमराह दुसऱ्या कसोटीपूर्वीही एजबॅस्टनमध्ये सराव करताना दिसत आहे. भारतीय संघाचे सहाय्यक प्रशिक्षक रायन टेन डोशेट यांचे म्हणणे आहे की, “बुमराहने त्यांना सांगितले आहे की तो दुसरा कसोटी खेळण्यासाठी तयार आहे.” परंतु याबाबत भारतीय संघाच्या प्रशिक्षकांनी अद्याप कोणताही निर्णय घेतलेला नाही. (Ryan ten Doeschate on Jasprit Bumrah)