आयपीएलच्या इतिहासातील सर्वात यशस्वी संघ मुंबई इंडियन्ससाठी १५ व्या हंगामाची सुरुवात खूपच निराशाजनक राहिली आहे. मुंबईने चालू हंगामात आतापर्यंत ४ सामने खेळले आहेत आणि त्यापैकी एकही सामना संघ जिंकू शकला नाहीय. सध्या मुंबई इंडियन्स गुणतालिकेत ९ व्या क्रमांकावर आहे. अशात मुंबई फ्रेंचायझीच्या मालकीन निता अंबानी यांच्याकडून संघाला प्रोत्साहन मिळाले आहे.
रोहित शर्मा (Rohit Sharma) याच्या नेतृत्वातील मुंबई इंडियन्स (Mumbai Indians) सर्वाधिक आयपीएल ट्रॉफी जिंकणारा संघ आहे. मुंबईने आतापर्यंत ५ वेळा या टी-२० लीगचे विजेतेपद पटकावले आहे. परंतु चालू आयपीएल हंगामात मात्र संघ अपेक्षित प्रदर्शन करू शकलेला नाहीय. हंगामातील पहिले चारही सामने मुंबईने गमावले आहेत आणि संघ त्यांच्या पहिल्या विजयाच्या प्रतिक्षेत आहे.
आरसीबीविरुद्ध ८ एप्रिल रोजी मुंबईला हंगामातील सलग चौथा पराभव मिळाला आणि त्यानंतर स्वतः निता अंबानी (Nita Ambani) यांनी फोनवरून खेळाडूंना प्रोत्साहन दिले आहे. मुंबई इंडियन्सच्या अधिकृत सोशल मीडिया खात्यावरून हा व्हिडिओ शेअर केला गेला आहे.
