कोट्यावधी रुपयांमध्ये लखनऊच्या ताफ्यात सामील झालेला खेळाडू होणार संघातून बाहेर? ३ सामन्यात केल्यात फक्त २२ धावा

आयपीएल २०२२मधील १२वा सामना सोमवारी (०४ एप्रिल) डी. वाय. पाटील स्टेडिअम मुंबई येथे पार पडला. हा सामना लखनऊ सुपर जायंट्स विरुद्ध सनरायझर्स हैदराबाद संघात खेळण्यात आला. या सामन्यात लखनऊ संघाने १२ धावांनी विजय मिळवला. लखनऊच्या विजयाचा शिल्पकार आवेश खान ठरला. लखनऊ संघाचा हा आतापर्यंतचा दुसरा विजय होता. पहिल्या सामन्यात त्यांना गुजरात टायटन्सविरुद्ध सपाटून पराभव स्वीकारावा लागला होता. त्यानंतर त्यांनी चेन्नई सुपर किंग्सला आणि आता लखनऊ संघाला पराभवाचा धक्का दिलाय. मात्र, संघातील एक खेळाडू असा आहे, ज्याला जवळपास ५ कोटी रुपयांना ताफ्यात सामील करूनही तो सपशेल फ्लॉप ठरत आहे.

कोण आहे तो खेळाडू?
आयपीएल २०२२च्या (IPL 2022) मेगा लिलावात तब्बल ४ कोटी ६० लाखांना लखनऊ (Lucknow Super Giansts) संघाने आपल्या ताफ्यात घेतलेल्या खेळाडूचे नाव आहे मनीष पांडे (Manish Pandey). पांडे या हंगामातील आतापर्यंतच्या तिन्ही सामन्यांमध्ये सपशेल फ्लॉप ठरला आहे. गुजरातविरुद्धच्या (Gujarat Titans) पहिल्या सामन्यात तो केवळ ६ धावा करून तंबूत परतला होता. दुसरीकडे चेन्नईविरुद्धच्या (Chennai Super Kings) दुसऱ्या सामन्यातही त्याला खास कामगिरी करता आली नव्हती आणि तो ५ धावांवर तंबूत परतला होता. त्यानंतर हैदराबादविरुद्धच्या (Sunrisers Hyderabad) सामन्यात खेळताना तो १० चेंडूवर केवळ ११ धावा करून बाद झाला. या धावा करताना त्याने १ चौकार आणि १ षटकार ठोकला. अशाप्रकारे तो एकूण ३ सामन्यात केवळ २२ धावाच करू शकला.

LSGvsSRH | आवेशच्या भेदक माऱ्यानंतर होल्डरचा परिपूर्ण शेवट, लखनऊकडून हैदराबाद १२ धावांनी चितपट