चेन्नई सुपर किंग्ज (CSK) ने आयपीएल 2025 मध्ये त्यांच्या पहिल्या सामन्यात मुंबई इंडियन्सचा पराभव करून चांगली सुरुवात केली होती पण तेव्हापासून संघाने सलग 2 सामने गमावले आहेत. चेन्नईला त्यांच्या दुसऱ्या सामन्यात रॉयल चॅलेंजर्स बंगळुरू (RCB) कडून पराभव पत्करावा लागला. आता तिसऱ्या सामन्यात राजस्थान रॉयल्स (RR) कडून पराभव पत्करावा लागला आहे. गुवाहाटी येथे खेळल्या गेलेल्या या सामन्यात, राजस्थान रॉयल्सने नितीश राणाच्या शानदार फलंदाजी आणि लेग-स्पिनर वानिंदू हसरंगाच्या उत्कृष्ट गोलंदाजीच्या जोरावर चेन्नईचा 6 धावांनी पराभव करून हंगामातील आपला पहिला विजय नोंदवला.
प्रथम फलंदाजी करताना राजस्थान रॉयल्सने नितीश राणाच्या 81 धावांच्या स्फोटक खेळीच्या जोरावर 182 धावा केल्या. प्रत्युत्तरात, चेन्नई संघ निर्धारित 20 षटकांत 6 गडी गमावून केवळ 176 धावा करू शकला. राजस्थानचा फिरकी गोलंदाज वानिंदू हसरंगाने चेन्नईच्या फलंदाजांना रोखण्यात मोठी भूमिका बजावली, ज्याने 4 षटकांच्या कोट्यात फक्त 35 धावा देऊन 4 फलंदाजांचे बळी घेतले आणि आयपीएलमध्ये आपल्या नावावर एक खास विक्रम केला.
हसरंगाने राहुल त्रिपाठी, चेन्नईचा कर्णधार ऋतुराज गायकवाड, शिवम दुबे आणि विजय शंकर यांचे बळी घेतले. अशाप्रकारे, तो आयपीएलमध्ये चेन्नई सुपर किंग्जविरुद्धच्या सामन्यात 4 विकेट घेणारा तिसरा फिरकी गोलंदाज ठरला. याआधी फक्त हरभजन सिंग आणि ब्रॅड हॉग यांनीच ही महान कामगिरी केली होती. एवढेच नाही तर, हसरंगा हा राजस्थानचा दुसरा गोलंदाज आहे ज्याने सीएसके विरुद्ध आयपीएल सामन्यात 4 किंवा त्याहून अधिक विकेट्स घेतल्या आहेत. याआधी 2008 च्या आयपीएलमध्ये सोहेल तन्वीरने 14 धावा देऊन 6 विकेट घेतल्या होत्या.
आयपीएलमध्ये चेन्नई सुपर किंग्ज (CSK) विरुद्धच्या सामन्यात ४ विकेट घेणारे फिरकीपटू
5/18 – हरभजन सिंग (एमआय), मुंबई वानखेडे स्टेडियम, 2011
4/29 – ब्रॅड हॉग (केकेआर), कोलकाता, 2015
4/35 – वानिंदू हसरंगा (आरआर), गुवाहाटी, 2025
लक्ष्याचा पाठलाग करताना चेन्नईचा कर्णधार ऋतुराज गायकवाडने 63 धावांची शानदार खेळी केली, परंतु इतर फलंदाजांकडून मिळालेल्या पाठिंब्याअभावी संघाला सलग दुसऱ्या पराभवाला सामोरे जावे लागले. जगातील सर्वोत्तम फिनिशर मानला जाणारा महेंद्रसिंग धोनी संघाला विजयाच्या उंबरठ्यावरही नेऊ शकला नाही.
गेल्या सामन्यात नवव्या क्रमांकावर फलंदाजीसाठी आलेला धोनी यावेळी सातव्या क्रमांकावर फलंदाजीसाठी आला, जेव्हा चेन्नईला 12 चेंडूत 39 धावांची आवश्यकता होती. त्याने तुषार देशपांडेच्या चेंडूवर एक चौकार आणि एक षटकार मारला पण संदीप शर्माच्या शेवटच्या षटकात त्याची विकेट गेली. सीमारेषेजवळ उभ्या असलेल्या शिमरॉन हेटमायरने पुढे डायव्ह मारला आणि एक शानदार झेल घेतला, ज्यामुळे चेन्नईच्या विजयाच्या आशा संपुष्टात आल्या.
