आयपीएल 2026 मध्ये कोलकाता नाइट रायडर्सचा कर्णधार अजिंक्य रहाणेने मुंबई इंडियन्सविरुद्ध दमदार खेळी करत सर्वांचे लक्ष वेधून घेतले. त्याने अवघ्या 40 चेंडूंमध्ये 67 धावांची तुफानी अर्धशतकी खेळी साकारली. या खेळीत त्याने 4 चौकार आणि 6 षटकार ठोकत 167.50 च्या स्ट्राइक रेटने फलंदाजी केली. त्याच्या या आक्रमक खेळीमुळे केकेआरला 200 पेक्षा अधिक धावांचा टप्पा गाठता आला.
रहाणेच्या या खेळीमुळे केकेआरच्या संघाला मजबूत सुरुवात मिळाली. मुंबई इंडियन्सच्या भक्कम गोलंदाजी आक्रमणाविरुद्ध त्याने पहिल्याच षटकांपासून आक्रमक पवित्रा घेतला. ट्रेंट बोल्ट आणि हार्दिक पांड्या यांच्यावर त्याने विशेषतः जोरदार फटकेबाजी करत दबाव निर्माण केला. पावरप्ले दरम्यान केकेआरने 78/1 असा भक्कम स्कोर उभा केला, जो मुंबई इंडियन्सविरुद्ध त्यांचा सर्वाधिक पावरप्ले स्कोर ठरला.
या खेळीसह रहाणेने एक मोठा विक्रमही आपल्या नावावर केला आहे. यापूर्वी मुंबई इंडियन्सविरुद्ध केकेआरच्या कर्णधाराकडून सर्वाधिक वैयक्तिक धावसंख्या करण्याचा विक्रम गाैतम गंभीरच्या नावावर होता. त्याने 2016 मध्ये 65 धावा केल्या होत्या. मात्र रहाणेने 67 धावा करत हा 10 वर्ष जुना विक्रम मोडीत काढला आणि मुंबईविरुद्ध केकेआरचा नवा कर्णधार म्हणून सर्वोच्च वैयक्तिक धावसंख्या नोंदवली.
रहाणेच्या या खेळीचे आंतरराष्ट्रीय स्तरावरही कौतुक होत आहे. इंग्लंडचे माजी क्रिकेटपटू केविन पीटरसनने सोशल मीडियावर प्रतिक्रिया देत त्याच्या फलंदाजीचे कौतुक केले. त्याने म्हटले की त्याला नेहमीच रहाणेची फलंदाजी पाहायला आवडते. त्याच्या या प्रतिक्रियेमुळे रहाणेच्या खेळीला अधिक महत्त्व प्राप्त झाले.
या सामन्यात जसप्रीत बुमराहसारख्या अनुभवी गोलंदाजासमोरही रहाणेने संयम आणि आक्रमकतेचा उत्तम समतोल राखला. जसप्रीत बुमराह आणि ट्रेंट बोल्टसारख्या गोलंदाजांविरुद्ध अशी खेळी करणे हे सोपे नव्हते, पण रहाणेने आपल्या अनुभवाच्या जोरावर हे साध्य केले.
