आयपीएल 2026 साठी चाहत्यांमध्ये प्रचंड उत्साह पाहायला मिळत आहे. या हंगामातील पहिला सामना 28 मार्च रोजी गतविजेता आरसीबी (RCB) आणि सनरायझर्स हैदराबाद (SRH) यांच्यात रंगणार आहे. मात्र, रिपोर्ट्सनुसार, या सामन्यात सनरायझर्सच्या कर्णधारपदाची धुरा पॅट कमिन्सच्या (Pat Cummins) हाती नसेल. तो स्पर्धेच्या सुरुवातीच्या काही सामन्यांना मुकण्याची शक्यता असून, त्याच्या जागी एक भारतीय सलामीवीर संघाचे नेतृत्व करताना दिसेल.
या खेळाडूने टी-20 विश्वचषकाच्या फायनलमध्ये भारतासाठी वादळी अर्धशतकी खेळी केली होती. सनरायझर्स हैदराबादसाठी अभिषेक शर्मा (Abhishek Sharma) सुरुवातीच्या काही सामन्यांमध्ये कर्णधारपद भूषवताना दिसू शकतो. पॅट कमिन्स दुखापतीमुळे सध्या क्रिकेटपासून दूर आहे, त्यामुळे त्याच्यासाठी लगेच मैदानात उतरणे कठीण दिसत आहे. या दुखापतीमुळेच तो ऑस्ट्रेलियासाठी टी-20 विश्वचषकातही खेळू शकला नव्हता. मीडिया रिपोर्ट्सनुसार, तो आयपीएलच्या सुरुवातीच्या सामन्यांतूनही बाहेर राहू शकतो. अशा परिस्थितीत युवा अभिषेक शर्माकडे संघाची धुरा सोपवली जाऊ शकते.
अभिषेक शर्माने 2018 मध्ये आयपीएलमध्ये पदार्पण केले होते. त्या वेळी तो ‘दिल्ली कॅपिटल्स’ संघाचा भाग होता. त्यानंतरच्या पुढच्याच हंगामात तो ‘सनरायझर्स हैदराबाद’ संघात सामील झाला. 2022 सालापासून त्याने सनरायझर्ससाठी सलामीवीर म्हणून नियमित खेळायला सुरुवात केली आणि प्रतिस्पर्धी गोलंदाजांची दाणादाण उडवत स्वतःची वेगळी ओळख निर्माण केली. त्याने या स्पर्धेत आतापर्यंत खेळलेल्या 77 सामन्यांमध्ये 163 च्या स्ट्राईक रेटने 1816 धावा केल्या आहेत. या दरम्यान त्याची सरासरी 27.10 इतकी राहिली आहे.
