आयपीएलबाबत मोठी बातमी! सौरव गांगुलींनी घेतले ‘हे’ महत्वाचे निर्णय, स्थानिक स्पर्धांचाही समावेश

भारतीय क्रिकेट नियामक मंडळाचे अध्यक्ष सौरव गांंगुली यांनी इंडियन प्रीमियर लीग (आयपीएल) बाबत मोठी घोषणा केली आहे. पुरूषांचा 2023चा आयपीएल हंगाम कुठे खेळला जाणार हे त्यांनी स्पष्ट केले आहे. तसेच त्यांनी महिला आयपीएलबाबतही विशेष माहिती दिली असून स्थानिक क्रिकेटच्या सर्व स्पर्धाही खेळवण्याचा निर्णय घेतला आहे.

कोविड 19 नंतर पुन्हा एकदा पुरूषांचे आयपीएल पहिल्याप्रमाणे खेळले जाणार आहे. आधीच्या आयपीएलमध्ये संघ घरच्या आणि विरोधी संघाच्या मैदानावर सामने खेळत असत. हीच पद्धत पुन्हा सुरू करण्याचा निर्णय बीसीसीआयने घेतला आहे. यामुळे 2023 हंगामातील सर्व 10 संघ घरच्या आणि विरोधी संघाच्या मैदानावर सामने खेळणार आहेत. 2020चा हंगाम बाहेर खेळला गेला. हा हंगाम युएईच्या दुबई, शारजाह आणि अबुधाबी येथे खेळला गेला. 2021चा हंगामही दिल्ली, अहमदाबाद, मुंबई आणि चेन्नई येथे खेळला गेला तर काही सामने पुन्हा एकदा युएईमध्ये खेळवण्यात आले. आयपीएल 2022चे सामनेही मुंबई, पुणे, कोलकाता आणि अहमदाबाद येथेच खेळले गेले.