आयसीसी (ICC) टी20 वर्ल्ड कप 2026 मध्ये (15 फेब्रुवारी) रोजी भारत आणि पाकिस्तान यांच्यात हाय-व्होल्टेज सामना खेळला जाणार आहे. या सामन्यापूर्वी पाकिस्तानचा फिरकी गोलंदाज उस्मान तारिक याच्या गोलंदाजीच्या शैलीवरून (Bowling Action) मोठा गदारोळ माजला आहे. (10 फेब्रुवारी) रोजी अमेरिकेविरुद्ध झालेल्या सामन्यात तारिकने उत्कृष्ट गोलंदाजी करत तीन गडी बाद केले होते, परंतु त्याच्या कामगिरीपेक्षा त्याच्या ‘ॲक्शन’चीच चर्चा जास्त रंगली. तारिकच्या ॲक्शनवरील वाद सर्वप्रथम पीएसएल (PSL) मध्ये समोर आला होता, जेव्हा तीन सामने खेळल्यानंतर ऑन-फिल्ड पंच आसिफ याकूब आणि रिचर्ड यांनी त्याच्या ॲक्शनवर प्रश्न उपस्थित केले होते. मात्र, नंतर झालेल्या तपासणीत त्याची ॲक्शन पूर्णपणे योग्य असल्याचे स्पष्ट झाले.
चाचणी अहवालानुसार, तारिकचे ‘एल्बो एक्सटेंशन’ (कोपर सरळ होण्याचे प्रमाण) 15 डिग्रीच्या आत आहे, जे आयसीसीच्या नियमांनुसार अगदी योग्य मानले जाते. आयसीसीच्या नियमांनुसार, जेव्हा गोलंदाज चेंडू योग्य पद्धतीने टाकण्याऐवजी तो फेकून (Throw) मारतो, तेव्हा ती गोलंदाजीची शैली अवैध मानली जाते. नियमानुसार, जर एखादा खेळाडू चेंडू सोडताना आपला कोपर 15 डिग्रीपेक्षा जास्त झटकतो किंवा सरळ करतो, तर त्याची ॲक्शन अवैध ठरवली जाते. सामन्यादरम्यान पंचांना प्रत्यक्ष वेळी (Real-time) आपल्या डोळ्यांनी हे ठरवावे लागते की खेळाडू कायदेशीर पद्धतीने गोलंदाजी करत आहे की नाही. जर त्यांना ॲक्शन अवैध वाटली, तर ते तसा अहवाल सादर करतात.
