जो रूटने आर. अश्विनचा मोठा विक्रम मोडला, अशी कामगिरी करणारा इंग्लंडचा पहिलाच क्रिकेटपटू

इंग्लंडचा दिग्गज फलंदाज जो रूटने श्रीलंकेविरुद्धच्या तीन सामन्यांच्या एकदिवसीय मालिकेत शानदार कामगिरी केली. त्याने 123.50 च्या सरासरीने 247 धावा केल्या, ज्यामध्ये एक दमदार शतक आणि दोन अर्धशतकांचा समावेश आहे. मंगळवारी कोलंबो येथे खेळल्या गेलेल्या शेवटच्या एकदिवसीय सामन्यात रूटने 108 चेंडूत नऊ चौकार आणि एका षटकाराच्या मदतीने नाबाद 111 धावा केल्या. इंग्लंडने मर्यादित षटकांत 357 धावांचा डोंगर उभारला. श्रीलंकेचा 53 धावांनी पराभव करून मालिका 2-1 अशी जिंकली. रूटला मालिकावीर म्हणून घोषित करण्यात आले. हा त्याच्या कारकिर्दीतील 12वा मालिकावीर पुरस्कार आहे. त्याने आतापर्यंत 384 आंतरराष्ट्रीय सामने खेळले आहेत.

35 वर्षीय रूट आंतरराष्ट्रीय क्रिकेटमध्ये सर्वाधिक मालिकावीर पुरस्कार मिळवणाऱ्या क्रिकेटपटूंच्या यादीत संयुक्तपणे सहाव्या स्थानावर पोहोचला आहे. त्याने माजी भारतीय फिरकी गोलंदाज आर. अश्विन आणि वेस्ट इंडिजचा माजी क्रिकेटपटू ख्रिस गेल यांचा विक्रम धोक्यात आणला आहे. अश्विनने 287 आंतरराष्ट्रीय सामन्यांमध्ये 12 मालिकावीर पुरस्कार जिंकले आहेत. त्याने कसोटी क्रिकेटमध्ये 11 मालिकावीर मिळवले, जे सर्वात या स्वरूपातील संयुक्तपणे सर्वाधिक आहे. डिसेंबर 2024 मध्ये त्याने आंतरराष्ट्रीय क्रिकेटमधून निवृत्ती घेतली. दरम्यान, गेलने त्याच्या कारकिर्दीत 483 सामने खेळले ज्यामध्ये 12 वेळा त्याला मालिकावीर म्हणून गौरवण्यात आले.

भारताचा स्टार फलंदाज विराट कोहलीच्या नावावर आंतरराष्ट्रीय क्रिकेटमध्ये सर्वाधिक मालिकावीर पुरस्कार जिंकण्याचा विक्रम आहे. त्याने आतापर्यंत 559 सामने खेळले आहेत ज्यात 22 वेळा हा पुरस्कार जिंकला आहे. कोहलीने कसोटी आणि टी20 आंतरराष्ट्रीय सामन्यांमधून निवृत्ती घेतली आहे. दिग्गज फलंदाज सचिन तेंडुलकरने 24 वर्षांच्या कारकिर्दीत 664 सामने खेळल्यानंतर 20 वेळा हा पुरस्कार जिंकला. बांगलादेशचा अष्टपैलू शाकिब अल हसनला 17 वेळा मालिकावीर म्हणून निवडण्यात आले आहे. दक्षिण आफ्रिकेचा माजी अष्टपैलू जॅक कॅलिस या यादीत चौथ्या क्रमांकावर आहे, त्याने 519 सामन्यांमध्ये 15 पुरस्कार जिंकले आहेत.

आंतरराष्ट्रीय क्रिकेटमध्ये सर्वाधिक मालिकावीर पुरस्कार

22 – विराट कोहली
20 – सचिन तेंडुलकर
17 – शकिब अल हसन
15 – जॅक कॅलिस
13 – डेव्हिड वॉर्नर
13 – सनथ जयसूर्या
12 – जो रूट
12 – आर अश्विन
12 – ख्रिस गेल
11 – क्विंटन डी कॉक
11 – शॉन पोलॉक
11 – एस. चंद्रपॉल
11 – रिकी पाँटिंग
11 – मुथय्या मुरलीधरन