कामाच्या ताणामुळे नाही, तर ‘या’ कारणामुळे उपकर्णधार केएल राहुल पहिल्या वनडेत असेल अनुपस्थित

भारतीय संघाचा (team india) उपकर्णधार केएल राहुल (kl rahul) वेस्ट इंडीजविरुद्ध खेळल्या जाणाऱ्या पहिल्या एकदिवसीय सामन्यात अनुपस्थित असेल. वेस्ट इंडीजविरुद्धची ही मायदेशातील एकदिवसीय मालिका ६ फेब्रुवारीपासून खेळली जाणार आहे. मालिकेतील पहिल्या सामन्यात राहुल अनुपस्थित असला, तरी पुढच्या दोन्ही सामन्यांसाठी तो उपस्थित असेल. पहिल्या सामन्यातील राहुलच्या अनुपस्थितीविषयी महत्वाची माहिती समोर आली आहे.

वेस्ट इंडीजविरुद्धच्या या एकदिवसीय मालिकेपूर्वी भारताने दक्षिण अफ्रिकेविरुद्ध कसोटी आणि एकदिवसीय मालिका खेळली होती. भारताचा मर्यादित षटकांचा कर्णधार रोहित शर्मा दक्षिण अफ्रिकेविरुद्धच्या एकदिवसीय मालिकेत अनुपस्थित असल्यामुळे राहुलने संघाचे नेतृत्व केले होते. असे सांगितले जात होते की, दक्षिण अफ्रिका दौऱ्यानंतर कामाच्या तानातून विश्रांती घेण्यासाठी राहुल वेस्ट इंडीजविरुद्धच्या पहिल्या एकदिवसीय सामन्यात अनुपस्थित असेल. परंतु माध्यमांतील वृत्तानुसार राहुल त्याच्या बहिणीच्या लग्नामुळे पहिल्या सामन्यात खेळू शकणार नाहीय.

इएसपीएन क्रिकइन्फोच्या माहितीनुसार, केएल राहुल त्याच्या बहिणीच्या लग्नात सहभागी होण्यासाठी गेला आहे. याच कारणास्तव तो पहिल्या एकदिवसीय सामन्यात अनुपस्थित असेल. लग्न उरकून राहुल दुसऱ्या एकदिवसीय सामन्यासाठी उपस्थित राहील, अशी अपेक्षा आहे. त्यानंतर खेळल्या जाणाऱ्या वेस्ट इंडीजविरुद्धच्या टी-२० मालिकेतही राहुल उपस्थित असेल.

https://www.instagram.com/p/CWGcLUXMVaN/?utm_source=ig_web_copy_link