‘धोनीला पुढच्या हंगामात संधी देणे चेन्नईचा भावनिक निर्णय असेल’, वाचा असे का म्हणाला ऑस्ट्रेलियन दिग्गज

इंडियन प्रीमिअर लीग (आयपीएल) २०२२मध्ये शुक्रवारी (दि. २० मे) चेन्नई सुपर किंग्जने चालू हंगामातील त्यांचा शेवटचा सामना राजस्थान रॉयल्सविरुद्ध खेळला. राजस्थानने हा सामना ५ विकेट्सने जिंकला. सीएसकेच्या चाहत्यांना पराभव जरी मिळाला असला, तर कर्णधार एमएस धोनीकडून त्यांना एक आनंदाची बातमी देखील मिळाली. आयपीएलच्या पुढच्या हंगामात देखील धोनीने खेळण्याची इच्छा व्यक्त केली आहे. याच पार्श्वभूमीवर ऑस्ट्रेलियाचा माजी दिग्गज मॅथ्यू हेडनने धोनीच्या या निर्णयाबाबत स्वतःचे मत स्पष्टपणे व्यक्त केले.

एका वृत्तसंस्थेशी बोलताना मॅथ्यू हेडन (Matthew Hayden) म्हणाला की, “हे प्रत्यक्षात अवघड आहे. हे यावर अवलंबून आहे की, फ्रँचायझीला काय अपेक्षित आहे. तुम्हाला जर असा कर्णधार हवा आहे, ज्याने चालू हंगामात १२८च्या स्ट्राईक रेटने २०० धावा केल्या आहेत, तर काहीच हरकत नाही. त्याच्या हातामध्ये अजूनही ताकत आहे, तो अजूनही खेळपट्टीवर वेगाने धावू शकतो. तो संपूर्ण आयपीएलमध्ये सर्वात जास्त अनुभव असलेला कर्णधार देखील आहे. मात्र, जेव्हा तो संघाला पुन्हा बनवायचा विचार करेल, तेव्हा पाहावे लागेल की, त्यामध्ये एमएस धोनी (MS Dhoni) किती योगदान देणार आहे.”