आयपीएल 2026 ची सुरुवात मार्चच्या शेवटच्या आठवड्यापासून होणार आहे. एमएस धोनीने आंतरराष्ट्रीय क्रिकेटमधून निवृत्ती घेतली असून तो आता फक्त आयपीएलमध्ये खेळताना दिसतो. सीएसके (CSK) चाहते त्याला खेळताना पाहण्यासाठी वर्षभर वाट पाहत असतात. मात्र, गेल्या काही वर्षांत धोनीने अत्यंत खालच्या क्रमांकावर फलंदाजी करण्यास सुरुवात केली आहे. चाहत्यांना मात्र त्याला जास्तीत जास्त चेंडू खेळताना पाहायचे आहे. आता आयपीएल 2026 पूर्वी सीएसकेचा माजी खेळाडू आर. अश्विनने एक धक्कादायक दावा केला आहे.
एक व्हिडिओ समोर आला आहे, ज्यामध्ये 44 वर्षांच्या धोनीने आयपीएलसाठी सराव सुरू केला आहे. याच विषयावर आर. अश्विनने आपल्या युट्यूब चॅनेलवर भाष्य केले. धोनीची तयारी पाहून अश्विनला असे वाटते की, तो आयपीएल 2026 मध्ये क्रमांक 3 वर फलंदाजी करताना दिसेल. अश्विन म्हणाला, ‘असे वाटते की एमएस धोनी खेळण्यासाठी पूर्णपणे तयार आहे, कारण त्याने आतापासूनच सराव सुरू केला आहे. तो एकदम फिट दिसत आहे. अनेकजण म्हणत होते की तो प्लेइंग इलेव्हनमध्ये नसेल आणि हा त्याचा शेवटचा सीझन असेल.’
अश्विन पुढे म्हणाला, ‘आता असे वाटतेय की तो इम्रान ताहिरला पाहून प्रेरित झाला आहे. त्याला पाहून असे वाटत नाही की तो 9 व्या क्रमांकावर फलंदाजी करेल. उलट त्याची तयारी पाहून असे वाटते की तो नंबर 3 वर खेळेल आणि ज्या पद्धतीने तो सराव करत आहे, त्यावरून तो पॉवरप्लेमध्ये आक्रमकता दाखवेल असे चिन्ह दिसत आहे.’
यादरम्यान आर. अश्विनने धोनीव्यतिरिक्त सीएसकेच्या फलंदाजीच्या फळीचेही कौतुक केले. तो म्हणाला, ‘त्यांच्याकडे ऋतुराज गायकवाड, संजू सॅमसन, आयुष म्हात्रे, डेवाल्ड ब्रेविस, शिवम दुबे, कार्तिक शर्मा आणि प्रशांत वीर अशी शानदार बॅटिंग लाईनअप आहे. जर तुम्ही शेवटच्या दोन खेळाडूंचा कमी अनुभव बाजूला ठेवला, तर माझा प्रश्न हाच असेल की तुम्ही या फलंदाजीला कसे रोखणार? सीएसकेला 200 धावांपर्यंत रोखणेही कठीण जाईल. जेमी ओव्हरटन देखील धावा करत आहे. जर ताळमेळ आणि लय योग्य राहिली, तर ही बॅटिंग लाईनअप कमाल करेल.’
