गोष्ट न्यूझीलंडच्या क्रिकेटरशी लग्न करुन त्याच देशात महापौर झालेल्या भारतीय महिलेची

परदेशी क्रिकेटर भारतीय मुलींच्या प्रेमात पडल्याच्या व पुढे त्यांनी लग्न केल्याच्या अनेक घटना आपण पाहिल्या आहेत. नुकतेच पाकिस्तानच्या हसन अलीने भारतीय मूळ असणाऱ्या मुलीशी लग्न केले आहे तसेच ऑस्ट्रेलियाचा दिग्गज अष्टपैलू ग्लेन मॅक्सवेलने भारतीय महिलेशी साखरपुडा केला आहे. या दोन परदेशी खेळाडूंव्यतिरिक्त अनेक क्रिकेटपटू आहेत, ज्यांनी भारतीय मुलीशी लग्न केले आहे. अशीच एक कहाणी आहे न्यूझीलंडचे माजी क्रिकेटपटू ग्लेन टर्नर यांची. टर्नर यांनी भारतीय मूळ असणाऱ्या मुलीला आपले हृदय दिले आणि लग्नही केले. टर्नर यांनी भारतात राहणाऱ्या सुखविंदर गिलबरोबर लग्न केले आहे.

सुखविंदर यांना पाहून प्रेमात पडले होते टर्नर

टर्नर (Glenn Turner) १९६९ साली भारत दौऱ्यावर आले होते. यादरम्यान एका पार्टीमध्ये त्यांची ओळख सुखविंदरबरोबर झाली होती. जेव्हा सुखविंदर यांनी टर्नर यांना पाहिले, तेव्हा सुखविंदर त्यांना पाहून त्यांच्या प्रेमात पडल्या होत्या. येथूनच त्यांच्या प्रेमकहाणीला सुरुवात झाली होती. जवळपास ५ वर्षे एकमेकांना डेट केल्यानंतर त्यांनी १९७३ साली लग्न करण्याचा निर्णय घेतला.

पंजाबच्या लुधियाना येथे राहणाऱ्या सुखविंदर आज डुनेडिनमध्ये सुखविंदर सुखी टर्नर (Sukhwinder Sukhi Turner) या नावाने प्रसिद्ध आहेत. सुखविंदर आणि टर्नर यांना दोन अपत्य आहेत. सुखविंदर हे न्यूझीलंडला जाऊन राजकारणामध्ये सक्रिय झाल्या. त्या १९९५ पासून २००४ पर्यंत डुनेडिनच्या महापौर राहिल्या होत्या. तत्पुर्वी तीन वेळा त्या येथे नगरसेवक म्हणून निवडून आल्या होत्या. त्यांना न्यूझीलंडमधील मोठा भारतीय चेहरा मानले जाते. सोबतच त्यांना न्यूझीलंडमध्ये राहणाऱ्या भारतीयांचे प्रतिनिधित्व करणारा मोठा चेहराही मानले जाते.

२००४मध्ये त्यांना भारत सरकारकडून प्रवासी भारतीय सन्मानाने सन्मानित करण्यात आले.

सध्या सुखविंदर सुखी टर्नर यांचे वय ६८ वर्ष असून त्यांनी इतिहास व राज्यशास्त्र विषयात अमेरिकत शिक्षण घेतले होते. गेल्या ३८ वर्ष त्या डुनेडिनमध्ये रहात आहेत.

टर्नर सध्या न्यूझीलंड क्रिकेट सिलेक्शन समितीचे प्रमुख आहेत, तर सुखविंदर न्यूझीलंडमधील प्रसिद्ध नेत्या आहेत.

ग्लेन टर्नर यांनी आपला १९६९ साली ऑकलँड येथे वेस्ट इंडिजविरुद्ध कसोटीत पदार्पण केले होते. त्यांनी आपल्या क्रिकेट कारकिर्दीत न्यूझीलंड संघाकडून ४१ कसोटी सामने आणि ४१ वनडे सामने खेळले आहेत. त्यात त्यांनी कसोटीत ४४.६४ च्या सरासरीने २९९१ धावा केल्या आहेत. यामध्ये ७ शतके आणि १४ अर्धशतकांचा समावेश आहे. त्याचबरोबर वनडेत त्यांनी ४७ च्या सरासरीने १५९८ धावा केल्या आहेत. यामध्ये ३ शतके आणि ९ अर्धशतकांचा समावेश आहे.

टर्नर यांचा समावेश न्यूझीलंडच्या दिग्गज फलंदाजांमध्ये होतो. न्यूझीलंड क्रिकेटला महत्त्वपूर्ण स्थान मिळवून देणाऱ्या सर्वात यशस्वी खेळाडूंमध्ये टर्नर यांचा समावेश आहे. डुनेडीन येथे जन्मलेले टर्नर यांनी अनेक ऐतिहासिक विक्रमांची नोंद आपल्या नावावर केली आहे. ते प्रथम श्रेणी क्रिकेटमध्ये १०० शतके ठोकणाऱ्या निवडक खेळाडूंमध्ये सामील आहेत. याशिवाय ते क्रिकेट इतिहासात १५० धावा करणारे पहिले क्रिकेटपटू आहेत.

एक खास विक्रमाची नोंद येथे विशेष करावी वाटते तो म्हणजे ग्लेन टर्नर यांचा वनडे डावातील चेंडू खेळण्याचा विक्रम. टर्नर यांनी १९७५ विश्वचषकात ७जून १९७५ रोजी झालेल्या वनडे सामन्यात २०१ तर १४ जून १९७५ रोजी झालेल्या सामन्यात १७७ चेंडू खेळले होते. टर्नर सोडून कोणत्याही क्रिकेटरला वनडे डावात १७७ पेक्षा जास्त चेंडू खेळता आले नाहीत. शिवाय टर्नर दोन्ही वेळा नाबाद राहिले होते.

ट्रेंडिंग घडामोडी-

-आजच्याच दिवशी मुरलीने क्रिकेटला बाय बाय केलं आणि आजच्याच दिवशी मुरलीने इतिहासही रचला

-इंग्लंड संघाला मोठी झटका, वनडे मालिकेआधीच हा खेळाडू झाला जखमी

-आम्ही गांगुलीचं ऐकणार नाही, भारताला आम्ही सांगू ते करावंच लागेल