भारतीय क्रिकेट नियामक मंडळाने (BCCI) गुजरात टायटन्सचा वेगवान गोलंदाज इशांत शर्माला मोठा दंड ठोठावला आहे. बीसीसीआयने ईशांतच्या सामन्याच्या मानधनातून 25% कपात केली आहे. तो आयपीएल 2025 मध्ये त्याचा तिसरा सामना खेळण्यासाठी आला होता. या सामन्यात त्याला नुकसान सोसाव लागले. याशिवाय, त्याने आयपीएलच्या आचारसंहितेचेही उल्लंघन केले आहे, ज्यामुळे त्याला आयपीएलने शिक्षा सुनावली आहे. तथापि, त्याला ही शिक्षा का मिळाली हे अद्याप स्पष्ट झालेले नाही.
रविवारी हैदराबादमधील राजीव गांधी आंतरराष्ट्रीय स्टेडियमवर सनरायझर्स हैदराबाद विरुद्धच्या सामन्यादरम्यान आयपीएल आचारसंहितेचे उल्लंघन केल्याबद्दल गुजरात टायटन्सचा गोलंदाज ईशांत शर्माला त्याच्या सामन्याच्या मानधनाच्या 25 टक्के दंड आणि एक डिमेरिट पॉइंट देण्यात आला आहे, असे आयपीएलने जारी केलेल्या मीडिया रिलीजमध्ये म्हटले आहे.
ईशांत शर्माने कलम 2.2 अंतर्गत लेव्हल 1चा गुन्हा कबूल केला आणि मॅच रेफरीची शिक्षा स्वीकारली. आचारसंहितेच्या लेव्हल 1 च्या उल्लंघनासाठी, सामनाधिकाऱ्यांचा निर्णय अंतिम आणि बंधनकारक असतो. अशा परिस्थितीत, ईशांत शर्माला आगामी सामन्यांमध्ये सावधगिरी बाळगावी लागेल आणि अशी कोणतीही कृती करणे टाळावे लागेल. या सामन्यात गुजरात टायटन्सने शानदार विजय मिळवला.
सामन्यात ईशांतने चार षटके टाकली, पण एकही विकेट न घेता 53 धावा दिल्या. याशिवाय, त्याने या हंगामात दोन सामने खेळले आहेत, परंतु त्या सामन्यांमध्ये त्याने चांगली गोलंदाजी केली. तथापि, त्याला आतापर्यंत तीन सामन्यांमध्ये फक्त एकच विकेट मिळाली आहे. त्याच्या आयपीएल कारकिर्दीबद्दल बोलायचे झाले तर, तो 2008 पासून या स्पर्धेत सक्रिय आहे, परंतु काही हंगामात तो एकही सामना खेळला नाही. बऱ्याच वेळा तो विकला गेला नाही आणि काही वेळा तो जखमीही झाला.
