स्टार क्रिकेटपटू रिषभ पंतने लखनऊ सुपर जायंट्स (LSG) संघाच्या कर्णधारपदावरून पायउतार होण्याची विनंती केली आहे आणि फ्रँचायझीने त्याची ही विनंती तात्काळ मान्य केली आहे. त्याच्या नेतृत्वाखाली, संघाला आयपीएलच्या सलग काही हंगामांमध्ये निराशाजनक कामगिरीचा सामना करावा लागला होता. यंदाच्या आयपीएल हंगामातील संघाच्या अपयशानंतर हा मोठा निर्णय घेण्यात आला आहे.
भविष्यातही पंत या संघासाठी यष्टीरक्षक-फलंदाज म्हणून खेळणे सुरू ठेवेल, अशी शक्यता वर्तवली जात आहे. तथापि, या संदर्भात पंत किंवा लखनऊ सुपर जायंट्स या दोघांपैकी कोणीही अद्याप अधिकृतपणे सविस्तर माहिती जाहीर केलेली नाही.
आज शुक्रवारी (२९ मे) लखनऊ सुपर जायंट्सने सोशल मीडियावर एक अधिकृत निवेदन जारी केले. त्यात म्हटले आहे की, “रिषभ पंतने फ्रँचायझीकडे आपल्या कर्णधारपदाच्या जबाबदारीतून मुक्त करण्याची विनंती केली होती. आम्ही त्याची ही विनंती तात्काळ प्रभावाने मान्य केली आहे.”
संघाचे क्रिकेट संचालक टॉम मूडी यांनी म्हटले, “रिषभने स्वतः फ्रँचायझीकडे ही विनंती केली होती आणि आम्ही त्याचा आदर करत ती मान्य केली आहे. अशा प्रकारचे निर्णय घेणे कधीच सोपे नसते. कर्णधार म्हणून संघासाठी दिलेल्या योगदानाबद्दल आम्ही ऋषभचे आभारी आहोत. आमचे लक्ष आता संघाची नव्याने उभारणी करण्यावर आणि उत्कृष्ट कामगिरी साध्य करण्यासाठी आवश्यक ते बदल करण्यावर केंद्रित झाले आहे.”
दरम्यान, पंतच्या या निर्णयानंतर, लखनऊ सुपर जायंट्सचा पुढील कर्णधार कोण असेल, याबद्दल जोरदार चर्चा आणि तर्कवितर्क सुरू झाले आहेत.
