पाकिस्तान क्रिकेट संघासाठी चॅम्पियन्स ट्रॉफीची सुरुवात चांगली झाली नाही. मोहम्मद रिझवानच्या नेतृत्वाखालील पाकिस्तान संघाला पहिल्याच सामन्यात न्यूझीलंडकडून पराभवाचा सामना करावा लागला. या पराभवानंतर, पाकिस्तानचा स्टार सलामीवीर फखर झमान दुखापतीमुळे स्पर्धेतून बाहेर पडला आहे. आता कराची येथील राष्ट्रीय क्रिकेट स्टेडियमवर खेळल्या गेलेल्या सामन्यादरम्यान स्लो ओव्हर रेटसाठी आयसीसीने पाकिस्तानला दंड ठोठावला आहे.
कराची येथे झालेल्या न्यूझीलंडविरुद्धच्या स्पर्धेच्या पहिल्या सामन्यात स्लो ओव्हर रेटसाठी यजमान संघाला त्यांच्या मॅच फीच्या पाच टक्के दंड ठोठावण्यात आला आहे. मैदानावरील पंच रिचर्ड केटलबरो आणि शरफुद्दौला, तिसरे पंच जोएल विल्सन आणि चौथे पंच अॅलेक्स व्हार्फ यांनी आरोप निश्चित केले. सामनाधिकारी अँडी पायक्रॉफ्ट यांनी दंड ठोठावला. पाकिस्तानचा कर्णधार मोहम्मद रिझवानने गुन्हा कबूल केला, त्यामुळे औपचारिक सुनावणीची आवश्यकता नव्हती.
खेळाडू आणि खेळाडू सहाय्यक कर्मचाऱ्यांसाठी आयसीसीच्या आचारसंहितेच्या कलम 2.22 नुसार, जर एखादा संघ आवश्यक वेळेत गोलंदाजी करू शकला नाही, तर त्यांच्या संघाने दिलेल्या वेळेत गोलंदाजी न केल्यास प्रत्येक षटकासाठी खेळाडूंना त्यांच्या सामन्याच्या शुल्काच्या पाच टक्के दंड आकारला जातो.
1996 नंतर पहिल्यांदाच आयसीसी स्पर्धेचे आयोजन करणाऱ्या पाकिस्तानला पहिल्याच सामन्यात 60 धावांनी पराभव पत्करावा लागला. न्यूझीलंडच्या 320 धावांच्या प्रत्युत्तरात फलंदाजी करताना पाकिस्तानला 47.2 षटकांत फक्त 260 धावा करता आल्या. पाकिस्तान संघ रविवारी (23 फेब्रुवारी) दुबईमध्ये भारताविरुद्ध मैदानात उतरेल.
हेही वाचा –
“गूगलचा सिनेमॅटिक टच! जया बच्चन यांच्या डायलॉगसोबत दिला भारतीय संघाला पाठिंबा”
अफगाणिस्तान सेमीफायनल खेळणार; ‘या’ दिग्गजाने केली मोठी भविष्यवाणी
मोहम्मद शमीने रचला इतिहास! भारतासाठी अशी कामगिरी करणारा पहिलाच खेळाडू
