पाकिस्तान क्रिकेट बोर्डाने (PCB) टी-20 वर्ल्ड कप 2026 साठी आपला 15 सदस्यीय संभाव्य संघ आंतरराष्ट्रीय क्रिकेट परिषदेकडे (ICC) सोपवला आहे. विशेष म्हणजे, पीसीबीने हा संघ अद्याप अधिकृतपणे जाहीर केलेला नाही. मीडिया रिपोर्ट्सनुसार, बोर्डाच्या एका विश्वासार्ह सूत्राने ही माहिती दिली आहे. पाकिस्तानने अशा प्रकारे संघ गुप्त ठेवण्याची ही पहिलीच वेळ नाही.
संघाची यादी जाहीर न केल्यामुळे चाहत्यांच्या मनात अनेक शंका निर्माण झाल्या आहेत. अनेकांना वाटले की बाबर आझम किंवा शाहीन आफ्रिदीला डच्चू मिळाला आहे का? मात्र, मीडिया रिपोर्ट्सनुसार बाबर आझम (Babar Azam & Shaheen Afridi) आणि शाहीन आफ्रिदी या दोघांनाही या संभाव्य संघात स्थान मिळाले आहे. शाहीन सध्या दुखापतीशी झुंज देत असला तरी त्याला संधी देण्यात आली आहे.
अष्टपैलू खेळाडू शादाब खान (Shadab Khan) देखील संघाचा भाग आहे. खांद्याच्या दुखापतीमुळे गेल्या वर्षी मे महिन्यापासून तो आंतरराष्ट्रीय क्रिकेटपासून दूर होता, पण त्याने नुकतेच बिग बॅश लीग (BBL) 2025-26 द्वारे पुनरागमन केले आहे. जानेवारीत श्रीलंकेविरुद्ध होणाऱ्या टी-20 मालिकेसाठीही त्याची निवड झाली आहे.
निवड समितीने प्रामुख्याने त्याच खेळाडूंना पसंती दिली आहे जे श्रीलंकेविरुद्धच्या आगामी मालिकेचा भाग आहेत. या संभाव्य यादीत फहीम अशरफ, मोहम्मद नवाज, सायम अयुब, साहिबजादा फरहान, फखर जमान, नसीम शाह, उस्मान खान, मोहम्मद वसीम ज्युनियर आणि सलमान अली आगा यांचा समावेश आहे.
या संपूर्ण यादीत सर्वात महत्त्वाची गोष्ट म्हणजे वेगवान गोलंदाज हॅरिस रौफ (Haris Rauf) याचे नाव कुठेही दिसत नाही, ज्यामुळे क्रिकेट चाहत्यांकडून आश्चर्य व्यक्त केले जात आहे.
