टी20 वर्ल्ड कप 2026 (T-20 World Cup 2026) भारत आणि श्रीलंकेच्या यजमानपदाखाली खेळवला जाणार आहे. या स्पर्धेची सुरुवात 7 फेब्रुवारीपासून होईल आणि पहिला सामना श्रीलंकेत पाकिस्तान आणि नेदरलँड्स यांच्यात खेळवला जाईल. मात्र, टी-20 विश्वचषकापूर्वीच श्रीलंकेत पावसाचा हाहाकार पाहायला मिळत आहे, ज्यामुळे इंग्लंड आणि श्रीलंका यांच्यातील पहिला टी-20 सामना थांबला आहे.
इंग्लंड आणि श्रीलंका यांच्यातील तीन सामन्यांच्या टी-20 मालिकेतील पहिला सामना शुक्रवारी (30जानेवारी) भारतीय वेळेनुसार संध्याकाळी 7 वाजता सुरू होणार होता, परंतु पावसामुळे सामना वेळेवर सुरू होऊ शकला नाही. सामन्याचा टॉस 6:30 वाजता होणार होता, पण पावसामुळे अजून टॉसदेखील होऊ शकलेला नाही.
ताज्या अपडेटनुसार, तिथे सतत पाऊस पडत आहे. सामना सुरू होणे तर लांबच, पण टॉसबद्दलही अद्याप कोणतीही अपडेट नाही. विशेष म्हणजे, टीम इंडियाला श्रीलंकेत लीग स्टेजचा एक सामना पाकिस्तानविरुद्ध खेळायचा आहे.
भारत-पाकिस्तान यांच्यातील हा सामना 15 फेब्रुवारीला कोलंबोमध्ये होणार आहे. लीग स्टेजमधील हा कदाचित स्पर्धेतील सर्वात ‘हाय व्होल्टेज’ सामना असेल. चाहते भारत आणि पाकिस्तानमधील सामना पाहण्यासाठी खूप उत्सुक असतात.
श्रीलंकेत आगामी टी-20 विश्वचषकाचे अनेक सामने खेळवले जाणार आहेत. पाकिस्तान तर आपले सर्व सामने श्रीलंकेतच खेळणार आहे. जर स्पर्धेदरम्यान असाच पाऊस पडला, तर पाकिस्तानसाठी वर्ल्ड कप कठीण होऊ शकतो. आता टी-20 वर्ल्ड कपमध्ये श्रीलंकेचे हवामान कसे राहते, हे पाहणे औत्सुक्याचे ठरेल. महत्वाची गोष्ट म्हणजे, श्रीलंकेत एकूण 3 ठिकाणी वर्ल्ड कपचे सामने खेळवले जातील. यात कोलंबोमधील दोन मैदाने आणि पल्लेकेलेमधील एका मैदानाचा समावेश आहे.
