मुंबई। गुरुवारी (२२ एप्रिल) इंडियन प्रीमीयर लीग २०२१ हंगामात रॉयल चॅलेंजर्स बेंगलोर विरुद्ध राजस्थान रॉयल्स संघात सामना पार पडला. हा सामना रॉयल चॅलेंजर्स बेंगलोरने १० विकेट्सने जिंकत या हंगांमातील सलग चौथा विजय नोंदवला. याबरोबरच त्यांनी एक खास कारनामाही केला आहे, जो आजपर्यंत आयपीएलमध्ये कोणालाही करता आला नव्हता.
आयपीएलमध्ये बेंगलोरचा मोठा कारनामा
आयपीएल इतिहासामध्ये १० विकेट्सने सामना जिंकण्याची ही बेंगलोरची ही चौथी वेळ आहे. त्यामुळे आयपीएलमध्ये ४ सामने १० विकेट्सने जिंकणारा बेंगलोर पहिलाच संघ ठरला आहे. यापूर्वी कोणालाही हा विक्रम करता आलेला नाही.
बेंगलोरने यापूर्वी २०१० साली आयपीएलमध्ये सर्वात प्रथम राजस्थानविरुद्धच १० विकेट्सने विजयाची नोंद केली होती. त्यानंतर त्यांनी २०१५ आयपीएलमध्ये त्यांनी दिल्ली डेअरडेविल्सला (आताचे नाव दिल्ली कॅपिटल्स) १० विकेट्सने पराभवाची धूळ चारली होती. यानंतर २०१८ आयपीएल हंगामात बेंगलोरने किंग्स इलेव्हन पंजाब (आताचे नाव पंजाब किंग्स) विरुद्ध १० विकेट्सने विजय मिळवला होता.
आयपीएलमध्ये १० विकेट्सने विजय मिळवणारे संघ
बेंगलोर पाठोपाठ सनरायझर्स हैदराबाद, मुंबई इंडियन्स आणि चेन्नई सुपर किंग्स या तीन संघांनी प्रत्येकी २ वेळा आयपीएलमध्ये १० विकेट्सने विजय मिळवला आहे. तर राजस्थान रॉयल्स, डेक्कन चार्जर्स, दिल्ली कॅपिटल्स, कोलकाता नाईट रायडर्स आणि पंजाब किंग्स या ५ संघांना आत्तापर्यंत आयपीएलमध्ये प्रत्येकी १ सामन्यात १० विकेट्सने विजय मिळवता आला आहे.
बेंगलोरचा मोठा विजय
गुरुवारी राजस्थान रॉयल्सने प्रथम फलंदाजी करताना २० षटकात ९ बाद १७७ धावा केल्या होत्या. त्यांच्याकडून शिवम दुबेने सर्वाधिक ४६ धावांची खेळी केली. तर राहुल तेवातियाने ४० धावा केल्या. या दोघांव्यतिरिक्त केवळ रियान पराग(२५) आणि कर्णधार संजू सॅमसन (२१) यांनाच २० धावांचा टप्पा पार करता आला.
बेंगलोरकडून मोहम्मद सिराज आणि हर्षल पटेलने प्रत्येकी ३ विकेट्स घेतल्या. तर काईल जेमीसन, केन रिचर्डसन आणि वॉशिंग्टन सुंदरने प्रत्येकी १ विकेट घेतली.
प्रतिउत्तरादाखल १७८ धावांच्या आव्हानाचा पाठलाग करण्यासाठी बेंगलोरकडून सलामीला उतरलेल्या विराट कोहली आणि देवदत्त पडीक्कलने एकही विकेट न गमावता १६.३ षटकातच विजय मिळवला. विराट कोहलीने ४७ चेंडूत ६ चौकार आणि ३ षटकारांसह नाबाद ७२ धावा केल्या आणि देवदत्त पडीक्कलने ५२ चेंडूत ११ चौकार आणि ६ षटकारांसह नाबाद १०१ धावा केल्या.
महत्त्वाच्या बातम्या –
पॉवर प्लेमध्ये राजस्थान रॉयल्स टाय टाय फिस्स! बनवला ‘हा’ नकोसा विक्रम
RCB vs RR : पडीक्कलचे शतक आणि विराटचे अर्धशतक; बेंगलोरचा राजस्थानविरुद्ध १० विकेट्सने ‘रॉयल’ विजय
विराटचा ऐतिहासिक कारनामा! आयपीएलमध्ये ‘असा’ पराक्रम करणारा कोहली बनला जगातील पहिलाच क्रिकेटपटू
