मोहम्मद सिराज अनेक वर्षांपासून आयपीएलमध्ये आरसीबीकडून खेळत होता. तो या संघाशी खूप जोडलेला होता, पण आयपीएलमध्ये असेच घडते. मित्र फक्त एका वर्षात शत्रू बनतात. कधीकधी तुम्ही एखाद्या संघाला जिंकवण्यासाठी सर्वतोपरी प्रयत्न करता, पण पुढच्याच वर्षी तुम्ही त्या संघाला हरवण्याचा प्रयत्न सुरू करता. मोहम्मद सिराज बऱ्याच वर्षांनी आरसीबीविरुद्ध खेळत होता, ज्यात त्याने या सामन्यात धुमाकूळ घातला. दरम्यान, त्याने तीन विकेट्स घेत झहीर खानलाही मागे टाकले आहे.
आरसीबीविरुद्धच्या सामन्यात मोहम्मद सिराजने तीन विकेट्स घेतल्या.
सिराज 2018 पासून रॉयल चॅलेंजर्स बंगळुरूकडून सतत खेळत होता. त्याच्या प्रभावी कामगिरीमुळे त्याने संघातील आपले स्थान कायम ठेवले. पण यावेळी लिलावात तो आरसीबीपासून वेगळा झाला. तो आता गुजरात टायटन्सकडून खेळत आहे. मोहम्मद सिराजने 2017 मध्ये आयपीएलमध्ये पदार्पण केले असले तरी, तेव्हा तो एसआरएच म्हणजेच सनरायझर्स हैदराबादकडून खेळत होता. मोहम्मद सिराजने या वर्षी आरसीबी विरुद्धच्या त्याच्या पहिल्याच सामन्यात चमत्कार केला. त्याने चार षटकांत फक्त 19 धावा देऊन तीन खेळाडूंना पॅव्हेलियनमध्ये पाठवले. त्याने प्रथम आरसीबीचा सलामीवीर फिल साॅल्टला बाद केले. यानंतर, देवदत्त पडिक्कललाही पॅव्हेलियनमध्ये पाठवले. यानंतर, त्याने आक्रमक फलंदाजी करणाऱ्या लियाम लिव्हिंगस्टोनलाही बाद केले.
आता तो बेंगळुरूच्या चिन्नास्वामी स्टेडियमवर सर्वाधिक विकेट्स घेणाऱ्या गोलंदाजांच्या यादीत दुसऱ्या क्रमांकावर पोहोचला आहे. या मैदानावर सर्वाधिक 52 विकेट्स युजवेंद्र चहलच्या नावावर आहेत. तो अनेक वर्षे आरसीबीकडून खेळला आहे. आता चिन्नास्वामी स्टेडियमवर मोहम्मद सिराजच्या नावावर 29 विकेट्स आहेत. या स्टेडियमवर झहीर खानने 28 विकेट्स घेतल्या होत्या. या यादीत चौथ्या क्रमांकावर विनय कुमार आहे, ज्याने येथे 27 विकेट्स घेतल्या आहेत.
