ऋषभ पंतला श्रीलंका दौऱ्यावर होणाऱ्या 2 सामन्यांच्या कसोटी मालिकेसाठी टीम इंडियात स्थान देण्यात आले आहे. यावर दक्षिण आफ्रिकेचा माजी कर्णधार एबी डिव्हिलियर्सने आश्चर्य व्यक्त केले. डिव्हिलियर्स म्हणाला की, पंत आयपीएल 2026 मध्ये कमी ऊर्जा आणि आत्मविश्वासाने खेळताना दिसला होता. तरीही, यासोबतच त्याने पंतच्या शानदार पुनरागमनाची आशाही व्यक्त केली.
पंतबद्दल आपल्या यूट्यूब चॅनेलवर बोलताना एबी डिव्हिलियर्स म्हणाला, “ऋषभ पंतची निवड झाली आहे, जे माझ्या मते थोडे धक्कादायक आहे. आपल्याला हे पाहावे लागेल की त्याची फिटनेस कशी आहे आणि चांगली कामगिरी करण्याची त्याची इच्छाशक्ती कशी आहे, कारण आयपीएलदरम्यान त्याचा आत्मविश्वास आणि ऊर्जा थोडी कमी वाटत होती.”
पुढे पंतच्या पुनरागमनाबद्दल बोलताना डिव्हिलियर्स म्हणाला, “पण आता तो पुन्हा एकदा भारताचे प्रतिनिधित्व करत आहे आणि मला खात्री आहे की यामुळे जर्सी नंबर 17 ची सर्वोत्कृष्ट कामगिरी पाहायला मिळेल. मी त्याचा खूप मोठा चाहता आहे. मला फक्त त्याला पूर्ण जोशात खेळताना पाहायचे आहे.”
भारताच्या कसोटी संघात मध्य प्रदेशचा ३३ वर्षांचा अष्टपैलू खेळाडू सारांश जैन यालाही संधी मिळाली आहे. या अष्टपैलू खेळाडूबद्दल बोलताना डिव्हिलियर्स म्हणाला, “सारांश जैन हे एक मोठे सरप्राईज आहे. तो 33 वर्षांचा आहे आणि काही काळापासून प्रथम श्रेणी क्रिकेट खेळत आहे. अखेर त्याला संधी मिळाली हे पाहून खूप आनंद झाला. तो वॉशिंग्टन सुंदरसारखाच उजव्या हाताचा ऑफ-स्पिनर आणि डाव्या हाताचा फलंदाज आहे.”
शुभमन गिलच्या नेतृत्वाखालील टीम इंडिया 15 ऑगस्टपासून श्रीलंका दौऱ्यावर 2 सामन्यांची कसोटी मालिका खेळणार आहे. मालिकेतील दोन्ही सामने अनुक्रमे गॅले आणि कोलंबो येथे होतील. दुसऱ्या कसोटी सामन्याची सुरुवात 23 ऑगस्टपासून होईल.
