मोठी बातमी! ऑस्ट्रेलियाचे दिग्गज यष्टीरक्षक काळाच्या पडद्याआड, यष्टीमागे घेतलेल्या ४३९ विकेट्स

क्रिकेटविश्वातून एक धक्कादायक वृत्त समोर येत आहे. ऑस्ट्रेलियाचे दिग्गज यष्टीरक्षक फलंदाज रॉड मार्श यांचे शुक्रवारी (४ मार्च) निधन झाले. त्यांना गुरुवारी (२४ फेब्रुवारी) तीव्र हृदयविकाराचा झटका आला होता. त्यामुळे त्यांना तातडीने हॉस्पिटलमध्ये दाखल करण्यात आले होते. मात्र, आयुष्याची लढाई लढत असताना त्यांनी ऍडलेडमधील हॉस्पिटलमध्ये अखेरचा श्वास घेतला. 

गुरुवारी ७४ वर्षीय रॉड मार्श हे बुंडाबर्ग येथे बुल्स मास्टर्स चॅरीटी ग्रुपच्या एका कार्यक्रमासाठी गेले होते. तिथेच त्यांना हृदयविकाराचा झटका आला होता. त्यावेळी अँब्युलन्सची वाट न पाहाता बुल्स मास्टर्सचे अधिकारी जॉन ग्लेनविल आणि डेविड हिलियर यांनी त्यांना हॉस्पिटलमध्ये दाखल केले होते, असे वृत्त समोर आले होते. त्यानंतर ते काही दिवसांनी कोमात गेल्याचेही त्यांच्या कुटुंबियांनी सांगितले होते. अखेर शुक्रवारी त्यांनी अखेरचा श्वास घेतला.

रॉड मार्श यांची कारकिर्द
ऑस्ट्रेलियाच्या यशस्वी यष्टीरक्षकांमध्ये रॉड मार्श यांची गणना होते. ते ऑस्ट्रेलियाचे तिसरे सर्वात यशस्वी यष्टीरक्षक आहेत. त्यांनी १९७० ते १९८४ असे १४ वर्षे आंतरराष्ट्रीय क्रिकेटमध्ये ऑस्ट्रेलियाचे प्रतिनिधित्त्व केले. या १४ वर्षात त्यांनी ९६ कसोटी आणि ९२ वनडे सामने खेळले. त्यांनी ९६ कसोटीत ३ शतके आणि १६ अर्धशतकांसह ३६३३ धावा केल्या. तसेच त्यांनी वनडेत ४ अर्धशतकांसह १२२५ धावा केल्या.

तसेच त्यांच्या नावावर अनेक विक्रम देखील आहेत. ऑस्ट्रेलियाचे कसोटीमध्ये शतक करणारे पहिले यष्टीरक्षक फलंदाज होते. त्याचबरोबर त्यांनी डेनिस लीलीच्या गोलंदाजीवर ९५ झेल घेतले आहेत. गोलंदाज आणि क्षेत्ररक्षक जोडीचा हा आजही जागतिक विक्रम आहे.

त्याचबरोबर त्यांनी आंतरराष्ट्रीय क्रिकेटमध्ये यष्टीमागे ४७९ विकेट्सही घेतल्या आहेत. यात ४६३ झेल आणि १६ यष्टीचीत विकेट्सचा समावेश आहे. ते ऑस्ट्रेलियाचे ऍडम गिलख्रिस्ट (९०५) आणि इयान हेली (६२८) यांच्यानंतर यष्टीमागे सर्वाधिक विकेट्स घेणारे यष्टीरक्षक आहेत.

रॉड मार्श यांनी प्रथम श्रेणी क्रिकेटमध्ये २५७ सामने खेळले असून ११०६७ धावा केल्या आहेत, तसेच अ दर्जाच्या क्रिकेटमध्ये त्यांनी १४० सामन्यांत २११९ धावा केल्या आहेत.

याशिवाय त्यांनी त्यांच्या कारकिर्दीत समालोचक आणि राष्ट्रीय निवडकर्ता म्हणूनही भूमीका निभावली.

महत्त्वाच्या बातम्या – 

गुणवंत खेळाडू तयार करण्यासाठी हनुमा विराहीने उचलली जबाबदारी, दिली ‘एवढ्या’ लाखांची देणगी

IND vs SL: पहिल्या कसोटीत टीम इंडियाने जिंकला टॉस; पुजारा-रहाणेच्या जागेवर ‘या’ खेळाडूंना संधी

विराट कोहलीने केली रवी शास्त्रींची नक्कल, माजी प्रशिक्षकाने स्वत: शेअर केला मजेशीर व्हिडिओ