आयसीसीने आपली नवी रँकिंग जाहीर केली आहे, ज्यात रोहित शर्मा जगातील नवीन क्रमांक-1 वनडे फलंदाज ठरला आहे. यापूर्वी या स्थानावर शुबमन गिल होता, पण आता तो तिसऱ्या क्रमांकावर सरकला आहे. रोहितने ऑस्ट्रेलियाविरुद्धच्या वनडे मालिकेत जबरदस्त कामगिरी केली होती. त्याने दुसऱ्या सामन्यात अर्धशतक (73 धावा) आणि तिसऱ्या सामन्यात नाबाद 121 धावा ठोकल्या होत्या. त्याला तिसऱ्या सामन्याचा तसेच संपूर्ण मालिकेचा सर्वोत्कृष्ट खेळाडू म्हणून निवडण्यात आले.
आयसीसीने आपली नवी रँकिंग बुधवार, (29 ऑक्टोबर) रोजी अपडेट केली आहे. रोहित शर्मा दोन स्थानांनी वर सरकून वनडे फलंदाजांच्या यादीत पहिल्या क्रमांकावर पोहोचला आहे. रोहितकडे 781 रेटिंग पॉइंट्स आहेत, तर शुबमन गिल 745 रेटिंगसह तिसऱ्या स्थानावर गेला आहे. दुसऱ्या स्थानावर अफगाणिस्तानचा इब्राहिम जादरान 764 रेटिंगसह कायम आहे.
ऑस्ट्रेलियाविरुद्धच्या तिसऱ्या वनडे सामन्यात विराट कोहलीने रोहित शर्मासोबत नाबाद 168 धावांची भागीदारी करत भारताला 9 विकेटने विजय मिळवून दिला होता. कोहलीने 81 चेंडूंमध्ये 74 धावा केल्या होत्या. मात्र आयसीसी रँकिंगमध्ये विराट कोहलीला तोटा झाला आहे, कारण या सामन्यापूर्वीच्या दोन वनडे सामन्यांमध्ये तो सलग ‘डक’ म्हणजेच शून्यावर बाद झाला होता. इतिहासात पहिल्यांदाच असे घडले की विराट कोहली सलग दोन वनडे सामन्यांमध्ये शून्यावर बाद झाला.
आयसीसीच्या वनडे फलंदाजी रँकिंगमध्ये विराट कोहलीला एका स्थानाचा फटका बसला असून तो पाचव्या वरून सहाव्या स्थानावर गेला आहे. त्याच्याकडे 725 रेटिंग पॉइंट्स आहेत. वनडेतील टॉप-10 फलंदाजांमध्ये चार भारतीयांचा समावेश आहे. रोहित, गिल, कोहली यांच्याशिवाय चौथा भारतीय म्हणजे श्रेयस अय्यर आहे.
आयसीसीच्या नव्या रँकिंगमध्ये श्रेयस अय्यरला एक स्थानाचा फायदा झाला असून तो 700 रेटिंगसह दहाव्या वरून नवव्या स्थानावर आला आहे. सांगायचे झाले तर, ऑस्ट्रेलियाविरुद्धच्या तिसऱ्या सामन्यात फिल्डिंगदरम्यान अय्यरला गंभीर दुखापत झाली होती, ज्यामुळे त्याला रुग्णालयात दाखल करावे लागले. सध्या तो अजूनही रुग्णालयात आहे, पण त्याची प्रकृती सुधारत आहे.
