सर्वोत्तम खेळाडूच्या पुरस्कारानंतर आली आफ्रिदीची प्रतिक्रिया; म्हणाला,” केएल राहुलला…”

शाहीन अफ्रिदीने भारताविरुद्धच्या टी२० विश्वचषकातील सामन्यात तीन महत्वाच्या विकेट्स घेतल्या होत्या. यामध्ये सलामीवीर रोहित शर्मा, केएल राहुल आणि त्यावेळी संघाचे नेतृत्व करणारा विराट कोहली यांचा समावेश होता. पाकिस्तान संघाने या सामन्यात १० विकेट्स राखून विजय मिळवला होता. भारताविरुद्ध विश्वचषकात मिळवलेला पाकिस्तानचा हा पहिलाच विजय ठरला होता. एका वृत्तवाहिनीशी बोलताना शाहीन अफ्रिदी म्हणाला की, “मी कसोटी क्रिकेटमध्ये अनेकदा पाच विकेट्स घेत चांगले प्रदर्शन केले आहे. मात्र, माझ्यासाठी सर्वात अविस्मरणीय सामना तो आहे, ज्यामध्ये आम्ही भारताविरुद्ध विजय मिळवला होता.”

शाहीन अफ्रिदी म्हणाला की, “माझ्यासाठी मागचे वर्ष अप्रतिम राहिले. मला आशा आहे की, मी २०२२ मध्येही चांगले प्रदर्शन करेल.” पुढे बोलताना शाहीन अफ्रिदीने टी२० विश्वचषकातील केएल राहुलच्या विकेटला त्याची मागच्या वर्षीची सर्वोत्कृष्ट विकेट सांगितले. तो म्हणाला, “चेंडू थोडा स्विंग करत होता आणि आम्हाला माहिती होते की, रोहितला लवकर बाद करत येऊ शकते, पण ज्या चेंडूवर राहुल बाद झाला, त्या चेंडूने मलाही हैराण केले.”