इंडियन प्रीमियर लीग स्पर्धा ही जगातील सर्वात मोठी टी२० लीग आहे. या स्पर्धेमुळे अनेक युवा खेळाडूंना आंतरराष्ट्रीय क्रिकेटमध्ये प्रवेश करण्याची संधी मिळाली आहे. यापूर्वीच देशांतर्गत क्रिकेटमध्ये सतत चांगली कामगिरी करावी लागायची. तेव्हा कुठे जाऊन खेळाडूंना भारतीय संघात स्थान मिळायचे. परंतु आता आयपीएल स्पर्धेच्या एका हंगामात चांगली कामगिरी करताच खेळाडूला राष्ट्रीय संघात संधी दिली जाते. कारण या स्पर्धेत अनेक आंतरराष्ट्रीय खेळाडू सहभाग घेत असतात. हे मात्र खरं आहे की, जर आयपीएल स्पर्धा नसती तर अनेक युवा खेळाडूंना वर यायची संधी मिळाली नसती.
आयपीएल स्पर्धेत कोलकाता नाईट रायडर्स संघाचे प्रतिनिधित्व करत असलेल्या शेल्डन जॅक्सनबाबतही असेच काहीसे घडले. त्याने स्वत: याबाबत खुलासा केला आहे की, वयाच्या २५ व्या वर्षी त्याने क्रिकेट पूर्णपणे सोडण्याचा निर्णय घेतला होता. सलग ५ वर्ष तो रणजी संघात होता. परंतु त्याला एकही सामना खेळण्याची संधी मिळाली नव्हती. अशा परिस्थितीत त्याच्या मित्राने त्याची समजूत काढली होती आणि त्याला सांगितले होते की, तू आणखी एक वर्ष क्रिकेटवर लक्ष केंद्रित कर.
कोलकाता नाईट रायडर्स संघासोबत चर्चा करताना शेल्डनने म्हटले की, “वयाच्या २५ व्या वर्षी मी क्रिकेट पूर्णपणे सोडण्याचा निर्णय घेतला होता. त्यानंतर माझा अत्यंत जवळचा मित्र शपथ शाहने मला म्हटले की, तू इतके वर्ष प्रचंड मेहनत केली आहेस. आणखी एक वर्ष मेहनत कर. एक वर्ष थांब, जर काही झालं नाही तर माझ्या कारखान्यात मी तुला नोकरी देईल.”
क्रिकेट नसते तर रस्त्यावर पाणीपुरी विकत असतो
“त्यावर्षी मी देशातील सर्व विक्रम मोडून काढले. मी त्या हंगामात सर्वाधिक धावा करणारा फलंदाज ठरलो होतो. इथूनच माझ्या कारकीर्दीला नवीन सुरुवात झाली होती. त्यावेळी मला जाणवले होते की, मी जर आयुष्यात काही करू शकतो तर ते क्रिकेटच आहे. मी माझ्या आयुष्यात क्रिकेटव्यतिरिक्त इतर कुठल्याही गोष्टीवर लक्ष दिले नाही. जर क्रिकेट माझ्यावर मेहरबान नसते तर, मी रस्त्यावर पाणीपुरी विकत असतो.”
तसेच शेल्डन जॅक्सन खुलासा करत म्हटले की, माजी भारतीय सलामीवीर गौतम गंभीरने त्याची आयपीएल स्पर्धेत निवड होण्यास मदत केली. रणजी ट्रॉफीचा सामना झाल्यानंतर, शेल्डन जॅक्सनने गौतम गंभीरची भेट घेतली होती. त्यावेळी त्याने गंभीरला विचारले होते की, मी माझ्या खेळात आणखी काय सुधारणा करू? त्यावेळी गंभीरने म्हटले होते की, “तू चांगला खेळतोय आणि आयपीएल स्पर्धेत लवकरच तुझी कोलकाता नाईट रायडर्स संघात (केकेआर) निवड होईल.” त्यावेळी शेल्डन जॅक्सनला ही गोष्ट पटली नव्हती. त्याला वाटले होते की, गंभीरने त्याचे मन ठेवण्यासाठी असे म्हटले आहे.
परंतु आयपीएल २०१७ लिलावाच्या पहिल्या टप्प्यात त्याची निवड झाली नव्हती. लिलावाचा किस्सा सांगताना शेल्डन जॅक्सन म्हणाला की, “त्यानंतर केकेआरच्या संघ व्यवस्थापकातील सदस्याने मला कॉल केला आणि म्हटले की, काळजी करू नको गौतम भाईने आम्हाला कॉल केला होता आणि आम्ही आता तुला संघात घेणार आहोत. त्यानंतर माझी केकेआर संघात निवड झाली होती. तेव्हापासून मी गौतम भाईला फॉलो करतोय.”
महत्त्वाच्या बातम्या-
माजी भारतीय कर्णधाराचा नव्या गड्यावर दाव; म्हणाले, रोहित नव्हे ‘त्याला’ भावी लीडरच्या रुपात तयार करा
फक्त ७ खेळाडूंनी केलंय टी२०मध्ये टीम इंडियाचं नेतृत्त्व, चक्क २ मुंबईकरांचा आहे यात समावेश