शिखर धवननं आंतरराष्ट्रीय आणि देशांतर्गत क्रिकेटला अलविदा केला आहे. त्यानं आपल्या शानदार कारकिर्दीत अनेक संस्मरणीय खेळी खेळल्या. धवननं कसोटी पदार्पणातच 187 धावांची जबरदस्त इनिंग खेळून ऑस्ट्रेलियाला नेस्तनाबूत केलं होतं.
शिखर धवनच्या अनेक खेळी चाहत्यांना कायम लक्षात आहेत. मात्र यापैकी धवनची सर्वात आवडती खेळी कोणती? शिखर धवननं स्वत: याबाबत सांगितलं आहे. ‘हिंदुस्तान टाईम्स’शी बोलताना धवननं सांगितलं की, एकदा अंगठ्याला दुखापत झाली असतानाही त्यानं 117 धावा ठोकल्या होत्या. ही त्याची सर्वात आवडती खेळी आहे.
2019 एकदिवसीय विश्वचषकाच्या ग्रुप स्टेजमध्ये भारतासमोर ऑस्ट्रेलियाचं आव्हान होतं. या सामन्यात भारतानं प्रथम फलंदाजी करताना 352 अशी मोठी धावसंख्या उभारली होती. मात्र भारताच्या डावाच्या 9व्या षटकात पॅट कमिन्सनं फेकलेला चेंडू धवनच्या अंगठ्याला लागला. नंतर त्याच्या अंगठ्याला फ्रॅक्चर झाल्याचं समोर आलं, तरीही तो मैदानातच उभा राहिला.
त्या घटनेची आठवण करताना शिखर धवन म्हणाला, “आम्ही विश्वचषकात ऑस्ट्रेलियाविरुद्ध सामना खेळत होतो. मी 25 धावांवर फलंदाजी करत होतो. तेव्हा माझा अंगठा फ्रॅक्चर झाला. तो चेंडू सुमारे 150 च्या वेगानं आला होता. तो थेट माझ्या अंगावर आला आणि हातावर आदळला. वेदना कमी करण्यासाठी मी गोळ्या घेतल्या आणि दुखापत असूनही मी 117 धावा केल्या.”
त्या सामन्यात रोहित शर्मा आणि शिखर धवन यांच्यात 127 धावांची सलामी भागीदारी झाली होती. त्यानंतर धवननं विराट कोहलीच्या साथीनं 93 धावा जोडल्या. दुखापतीमुळे धवनला हवाई शॉट्स खेळता आले नाहीत. त्यामुळे त्यानं 117 धावांच्या खेळीत एकही षटकार मारला नाही. शिखर धाववनं या खेळीत तब्बल 16 चौकार मारले. त्याची ही खेळी क्रिकेट चाहते कधीच विसरू शकणार नाहीत, हे नक्की!
हेही वाचा –
शिखर धवनला ‘गब्बर’ नाव कसं मिळालं? टोपण नावामागची रंजक कहानी जाणून घ्या
शिखर धवनच्या कारकिर्दीत भर घालणारे हे 5 अभेद्य विक्रम, याबाबतीत सचिन-कोहलीही खूप लांब
शिखर धवन ‘मिस्टर आयसीसी’ म्हणून का प्रसिद्ध, या तीन स्पर्धा देतात प्रत्यक्षात साक्ष!
