भारतविरुद्धच्या एसीसी महिला आशिया चषक सामन्यात शेफाली वर्माला बाद केल्यानंतर दिलेला इशारा पाकिस्तान महिला क्रिकेट संघाची कर्णधार फातिमा सनाला चांगलाच महागात पडला आहे. आचारसंहितेचा भंग केल्याबद्दल आंतरराष्ट्रीय क्रिकेट परिषदेने फातिमावर तिच्या मॅच फीच्या 10 टक्के दंड ठोठावला आहे. यासोबतच तिच्या खात्यात एक डिमेरिट पॉईंटही जोडला गेला आहे.
दुबईत शनिवारी खेळल्या गेलेल्या सामन्यात फातिमाची शफाली शिकार ठरली होती. भारताच्या डावाची सुरुवात करणाऱ्या शेफालीने सुरुवातीपासूनच आक्रमक अंदाज दाखवला होता, परंतु फातिमाच्या सहाव्या चेंडूवर ती माघारी परतली. शफालीने चेंडू थेट फातिमाच्या दिशेने खेळला आणि पाकिस्तानी कर्णधाराने सोपा झेल टिपला. त्यानंतर फातिमा या आव्हानात्मक खेळाडूच्या दिशेने ड्रेसिंग रूमकडे जाण्याचा इशारा केला होता. आयसीसीने या कृत्याला आचारसंहितेच्या कलम 2.5 अंतर्गत नियमांचे उल्लंघन मानले. हा नियम अशा शब्दांशी, हालचालींशी किंवा इशाऱ्यांशी संबंधित आहे, ज्यामुळे बाद झालेल्या फलंदाजाचा अपमान होऊ शकतो किंवा तिच्याकडून आक्रमक प्रतिक्रिया येऊ शकते.
फातिमाचा गेल्या 24 महिन्यांतील हा दुसरा गुन्हा आहे. यासोबतच तिच्या डिमेरिट पॉईंट्सची संख्या आता दोन झाली आहे. यापूर्वी 6 ऑगस्ट 2025 रोजी डब्लिनमध्ये आयर्लंडविरुद्धच्या टी-20 सामन्यादरम्यान तिला एक डिमेरिट पॉईंट मिळाला होता. विशेष म्हणजे, भारतविरुद्धच्या सामन्यात पाकिस्तानला दारुण पराभवाला सामोरे जावे लागले असले, तरी चेंडूने फातिमाची कामगिरी प्रभावी राहिली. तिने तीन बळी घेतले. भारताने पाकिस्तानला अवघ्या 55 धावांवर गुंडाळले होते आणि शफाली तिची पहिली शिकार ठरली होती.
फातिमाने आपली चूक मान्य केली आणि मॅच रेफरी सुप्रिया दास यांनी सुनावलेली शिक्षाही स्वीकारली. त्यामुळे या प्रकरणात औपचारिक सुनावणीची गरज पडली नाही. लेव्हल-1 च्या गुन्ह्यात अधिकृत इशारा देण्यापासून ते खेळाडूच्या मॅच फीच्या 50 टक्क्यांपर्यंत दंड आणि एक किंवा दोन डिमेरिट पॉईंट्सची तरतूद असते.
भारतविरुद्धच्या पराभवातून सावरण्यासाठी आता पाकिस्तानकडे जास्त वेळ नाही. पाकिस्तानी संघाला 7 सप्टेंबर रोजी आशिया चषकात हाँगकाँगविरुद्ध आपला पुढचा सामना खेळायचा आहे. या सामन्यातील विजय पाकिस्तानला उपांत्य फेरीत पोहोचवू शकतो. अशा प्रकारे या स्पर्धेत पुन्हा एकदा भारत आणि पाकिस्तान यांच्यात सामना होण्याची शक्यता निर्माण होऊ शकते.
