भारत आणि ऑस्ट्रेलिया यांच्यातील सिडनी येथे झालेल्या तिसऱ्या एकदिवसीय सामन्यापासून भारतीय एकदिवसीय संघाचा उपकर्णधार श्रेयस अय्यर रुग्णालयात दाखल आहे. यापूर्वी अय्यरवर शस्त्रक्रिया होत असल्याचे वृत्त समोर आले होते, परंतु आता भारतीय क्रिकेट नियामक मंडळाचे (बीसीसीआय) सचिव देवजीत सैकिया यांनी टाईम्स ऑफ इंडियाला सांगितले की, अय्यरवर उपचारादरम्यान कोणतीही शस्त्रक्रिया करण्यात आली नाही, उलट डॉक्टरांनी इतर उपचारांद्वारे त्याच्या शरीरातील अंतर्गत रक्तस्त्राव थांबवला.
बीसीसीआय सचिव देवजीत सैकिया यांनी टाईम्स ऑफ इंडियाला सांगितले की, “श्रेयस अय्यर आता खूपच बरा आहे. त्याची प्रकृती अशा वेगाने वाढत आहे की डॉक्टरांनाही अपेक्षा नव्हती.” बीसीसीआय सचिवांनी पुढे सांगितले की, “मी सिडनी येथील रुग्णालयात अय्यरसोबत राहणारे भारतीय संघाचे डॉक्टर डॉ. रिझवान यांच्याशी सतत संपर्कात आहे.” साधारणपणे, या दुखापतीतून बरे होण्यासाठी 6 ते 8 आठवडे लागू शकतात, परंतु श्रेयस त्यापेक्षा खूप लवकर बरा होईल.
देवजित सैकिया यांनी अय्यरच्या प्रकृतीबाबत पुढे सांगितले की, “डॉक्टर श्रेयसच्या प्रकृतीत सुधारणा झाल्याबद्दल समाधानी आहेत. त्याने आपले दैनंदिन कामकाज पुन्हा सुरू केले आहे. त्याची दुखापत खूप गंभीर होती, परंतु श्रेयस आता धोक्याबाहेर आहे. त्यामुळे अय्यरला आयसीयूमधून त्याच्या खोलीत हलवण्यात आले आहे.”
भारत आणि ऑस्ट्रेलिया यांच्यातील तिसऱ्या एकदिवसीय सामन्यात ऑस्ट्रेलियन खेळाडू अॅलेक्स कॅरीचा कठीण झेल घेताना अय्यरला दुखापत झाली. झेल घेतल्यानंतर श्रेयसला खूप वेदना होत असल्याचे दिसून आले. त्याला ताबडतोब मैदानाबाहेर काढण्यात आले. श्रेयस अय्यरची दुखापत इतकी गंभीर होती की त्याला सिडनी येथील रुग्णालयात दाखल करण्यात आले. बीसीसीआयने श्रेयस अय्यरच्या डाव्या बरगडीला दुखापत झाली आणि अंतर्गत रक्तस्त्राव झाला असल्याचे उघड केले. आता ताज्या अपडेटनुसार, अय्यर धोक्याबाहेर आहे.
