स्टीव्ह स्मिथने कसोटी क्रिकेटमध्ये एक नवा विक्रम प्रस्थापित केला आहे. तो कसोटीच्या इतिहासात ऑस्ट्रेलियासाठी सर्वाधिक धावा करणारा तिसरा फलंदाज बनला आहे. त्याने हा विक्रम दक्षिण आफ्रिकेविरुद्ध डरबन येथे खेळल्या जात असलेल्या पहिल्या कसोटी सामन्यादरम्यान केला. सामन्याच्या पहिल्या डावात स्मिथ 25 धावा करून बाद झाला, पण स्टीव्ह वॉला मागे टाकण्यात तो यशस्वी ठरला.
डरबन कसोटी सामना सुरू होण्यापूर्वी स्मिथने 125 कसोटी सामन्यांमध्ये 10,920 धावा केल्या होत्या. त्याला स्टीव्ह वॉला मागे टाकण्यासाठी फक्त ८ धावांची गरज होती. त्याने पहिल्या डावात 25 धावा केल्या, ज्यामुळे त्याच्या एकूण धावा 10,945 झाल्या आहेत. तर महान खेळाडू स्टीव्ह वॉने 168 सामन्यांमध्ये 10,927 धावा केल्या होत्या.
ऑस्ट्रेलियासाठी कसोटी क्रिकेटमध्ये सर्वाधिक धावा करण्याच्या बाबतीत आता फक्त 2 फलंदाज स्टीव्ह स्मिथच्या पुढे आहेत. हे 2 फलंदाज ॲलन बॉर्डर आणि रिकी पाँटिंग हे आहेत. माजी कर्णधार पाँटिंगने आपल्या ऐतिहासिक कारकिर्दीत 13,378 धावा केल्या, तर बॉर्डरने 11,174 धावा केल्या होत्या.
डरबनमध्ये खेळल्या जात असलेल्या पहिल्या कसोटी सामन्याबद्दल बोलायचे झाले तर, ऑस्ट्रेलियाने नाणेफेक जिंकून प्रथम फलंदाजी करण्याचा निर्णय घेतला होता. खराब प्रकाशामुळे पहिल्या दिवसाचा खेळ लवकर थांबवण्यात आला. 65.2 षटकांच्या खेळात ऑस्ट्रेलियाने 6 गडी गमावून 185 धावा केल्या आहेत. मॅट रेनशॉ 46 धावांवर खेळत आहे, तर कर्णधार पॅट कमिन्सनेही 33 धावा केल्या आहेत.
ऑस्ट्रेलियाने या सामन्यात निक मॅडिन्सनवर मोठा डाव खेळला होता, पण तो 33 चेंडू खेळून खाते न उघडताच बाद झाला. मार्नस लाबुशेनने 37 धावा, तर स्टीव्ह स्मिथने 25 धावांचे योगदान दिले.
