गोवा| सातव्या हिरो इंडियन सुपर लिग फुटबॉल स्पर्धेत (आयएसएल) जमशेदपूर एफसीविरुद्ध रविवारी(30 नोव्हेंबर) ओडीशा एफसीने दोन गोलांच्या पिछाडीनंतर 2-2 अशी बरोबरी साधत एक गुण खेचून आणला. या निकालामुळे सातव्या मोसमातील चुरस उत्तरोत्तर वाढत असल्याचे दिसून आली.
लिथुएनियाचा 33 वर्षीय स्ट्रायकर नेरीयूस वॅल्सकीसच्या पूर्वार्धात दोन गोलांमुळे उपयुक्त आघाडी मिळवलेल्या जमशेदपूरला विजयाची चांगली संधी होती, पण ओडीशाचे प्रतिनिधीत्व करणारा ब्राझीलचा 29 वर्षीय दिएगो मॉरीसिओ या बदली खेळाडूने त्यांना हताश केले. गोलरक्षक टी. पी. रेहेनेशला त्याच्या चुकीमुळे लाल कार्डसह मैदान सोडावे लागले. याचा जमशेदपूरला फटका बसला.
वास्को येथील टिळक मैदानावर ही लढत पार पडली. ओडीशाच्या बचाव फळीतील गौरव बोराने 11व्या मिनिटाला वॅल्सकीसचा फटका हाताने अडविला. त्यामुळे बोराला यलो कार्ड आणि जमशेदपूरला पेनल्टी बहाल करण्यात आली. त्यावर वॅल्सकीसने शांतचित्ताने फटका मारत चेंडू नेटच्या डाव्या कोपऱ्यात घालवला. त्यावेळी ओडीशाचा गोलरक्षक कमलजीत सिंग याचा अंदाज चुकला.
वॅल्सकीसचा आणि पर्यायाने जमशेदपूरचा दुसरा गोल 27व्या मिनिटाला झाला. यास ओडीशाची बचावातील चूक कारणीभूत ठरली. ओदीशाचा बचावपटू शुभम सारंगीने डावीकडून आगेकूच केली. त्यानंतर तो चेंडू बचाव फळीतील सहकाऱ्याच्या दिशेने मारण्याच्या बेतात होता, पण गाफील राहिल्यामुळे तो वॅल्सकीसच्या उपस्थितीची दखल घेऊ शकाल नाही. त्याचवेळी वॅल्सकीसने चपळाईने बोराचा पास अडवित अफलातून फटका मारला.
मध्यंतरास जमशेदपूरकडे दोन गोलांची भक्कम आघाडी होती. 16 मिनिटांचा खेळ बाकी असताना जमशेदपूरचा एक खेळाडू कमी झाला. ओदीशाचा मध्यरक्षक नंदकुमार शेखर याच्या पुढाकारामुळे रचली गेलेली चाल फोल ठरविण्यासाठी जमशेदपूरचा गोलरक्षक टी. पी. रेहेनेश आपला बॉक्स सोडून बाहेर आला. याबाबत सुरवातीला अनिश्चितता होती, पण पंच प्रतिक मोंडल यांनी विचारांती रेहेनेशला लाल कार्ड दाखविले. त्यामुळे पवन कुमार याला पाचारण करावे लागले.
एक खेळाडू कमी करण्यासाठी जमशेदपूरला मध्य फळीतील जॅकीचंद सिंग याचा बळी द्यावा लागला.
ओदीशाला याचा फायदा तीन मिनिटांत झाला. फ्री किकवर मारला गेलेला चेंडू शुभम सारंगी याच्या मार्फत मिळताच मॉरीसिओने गोल दवला. नऊ मिनिटे बाकी असताना जमशेदपूरचा स्ट्रायकर अनिकेत जाधव याला संधी होती, पण त्याची चाल रोखली गेली.
ओदीशाने जिद्दीने खेळत चाली कायम ठेवल्या. सहा मिनिटांच्या भरपाई वेळेतील तिसऱ्या मिनिटात डॅनिएल लाल्हीम्पुईया याने जमशेदपूरच्या क्षेत्रात निर्माण केलेल्या दडपणाचा फायदा उठवित मॉरीसिओने गोल केला.