7 फेब्रुवारीपासून टी-20 विश्वचषक 2026 ची सुरुवात होणार आहे. सर्व संघ आपल्या तयारीला लागले आहेत. टी-20 विश्वचषक 2024 प्रमाणेच आगामी विश्वचषक खेळवला जाईल, ज्यामध्ये 20 संघ सहभागी होतील. सर्व संघांना 4 गटात (Groups) विभागण्यात आले आहे. अनेक देशांनी विश्वचषकासाठी आपल्या संघांची घोषणा केली आहे. आता या यादीत आयर्लंडच्या नावाचाही समावेश झाला आहे. बोर्डाने आपल्या 15 सदस्यीय संघाची घोषणा केली आहे.
बोर्डाने आगामी टी-20 विश्वचषकासाठी पॉल स्टर्लिंगकडे कर्णधारपद सोपवले आहे, जो 35 वर्षांचा आहे. त्याच्याकडे आंतरराष्ट्रीय सामन्यांचा दांडगा अनुभव आहे. आयर्लंडकडून पॉल स्टर्लिंगने 156 टी-20 सामन्यांत 3798 धावा केल्या आहेत. त्याच्याशिवाय स्टार खेळाडू जोश लिटिल, बॅरी मॅकार्थी, हॅरी टेक्टर यांनाही संघात स्थान देण्यात आले आहे. आयर्लंड आपल्या मोहिमेची सुरुवात 8 फेब्रुवारीपासून करेल, जिथे त्यांचा सामना श्रीलंकेशी होईल. आयर्लंडला ग्रुप ‘बी’ मध्ये सह-यजमान श्रीलंका, ऑस्ट्रेलिया, ओमान आणि झिम्बाब्वे सोबत ठेवण्यात आले आहे.
आयर्लंडच्या नॅशनल मेन्स टीमचे सिलेक्टर अँड्र्यू व्हाईट म्हणाले, आम्ही या टी-20 विश्वचषकाची आतुरतेने वाट पाहत आहोत, असे म्हणणे कमीच ठरेल. 2022 च्या संस्मरणीय स्पर्धेनंतर, कदाचित 2024 मध्ये आम्ही आमच्या सर्वोत्तम फॉर्ममध्ये नव्हतो आणि तेव्हापासून आम्ही त्यात सुधारणा करण्याची वाट पाहत आहोत. 2024 च्या मोहिमेतील 15 खेळाडूंपैकी 12 खेळाडू या संघात असणे हे दर्शवते की आमचा संघ बऱ्याच अंशी स्थिर आहे.
टी-20 वर्ल्ड कप 2026 साठी आयर्लंडचा संघ:
पॉल स्टर्लिंग (कर्णधार), मार्क अडायर, रॉस अडायर, बेन कॅलिट्झ, कर्टिस कॅम्फर, गॅरेथ डेलानी, जॉर्ज डॉकरेल, मॅथ्यू हम्फ्रीज, जोश लिटिल, बॅरी मॅकार्थी, हॅरी टेक्टर, टिम टेक्टर, लोरकान टकर (उपकर्णधार), बेन व्हाईट, क्रेग यंग.
