WTC फायनल न खेळताच मिळणार 53 कोटी..! भारत-पाकसहित 9 देशांना मिळणार कोट्यवधी रूपये

2025च्या वर्ल्ड टेस्ट चॅम्पियनशिपचा फायनल (WTC Final 2025) सामना (11 ते 15) जून दरम्यान ऑस्ट्रेलिया आणि दक्षिण आफ्रिका यांच्यात खेळला जाईल. ऑस्ट्रेलिया हा गतविजेता आहे, तर दक्षिण आफ्रिका पहिल्यांदाच विजेतेपद जिंकण्याचे स्वप्न घेऊन मैदानात उतरेल. आंतरराष्ट्रीय क्रिकेट परिषदेने (ICC) अलिकडेच 2025च्या जागतिक कसोटी अजिंक्यपद स्पर्धेसाठी बक्षीस रकमेची घोषणा केली आहे. फक्त विजेत्या आणि उपविजेत्या संघाला एकूण 49.24 कोटी रुपये बक्षीसं मिळणार आहेत, परंतु भारत आणि पाकिस्तानसह असे संघ देखील आहेत जे अंतिम सामना न खेळता 53 कोटी रुपये घरी घेऊन जाणार आहेत.

2023-25च्या वर्ल्ड टेस्ट चॅम्पियनशिप स्पर्धेत एकूण 9 संघ खेळत होते. एकीकडे, दोन्ही फायनललिस्ट संघांमध्ये 49.24 कोटी रुपये वाटले जातील, तर दुसरीकडे, इतर 7 संघांनाही बक्षीस म्हणून कोट्यवधी रुपये मिळणार आहेत. तिसऱ्या क्रमांकावर राहिलेल्या भारताला 12.31 कोटी रुपये मिळतील, तर चौथ्या क्रमांकावर राहिल्याबद्दल न्यूझीलंडला 10.26 कोटी रुपये मिळतील.

आयसीसीने इंग्लंड आणि वेस्ट इंडिजसह इतर देशांवरही दया दाखवली आहे. नवव्या क्रमांकावर राहिलेल्या पाकिस्तानलाही 4.1 कोटी रुपये मिळणार आहेत. खरं तर, अंतिम फेरीतील संघांना वगळता, उर्वरित 7 संघांना अंतिम सामना न खेळता एकूण 53.33 कोटी रुपये मिळणार आहेत. यावेळी वर्ल्ड टेस्ट चॅम्पियनशिप (WTC Final) स्पर्धेचा बक्षीस पूल 102 कोटी रुपयांपेक्षा जास्त ठेवण्यात आला आहे.

वर्ल्ड टेस्ट चॅम्पियनशिप (WTC) 2019 मध्ये सुरू झाले आणि वर्ल्ड टेस्ट चॅम्पियनशिप फायनल स्पर्धा दर 2 वर्षांनी खेळवली जाते. पहिला फायनल सामना 2021 मध्ये खेळला गेला, जिथे न्यूझीलंडने भारताला 8 गडी राखून पराभूत करून विजेतेपद जिंकले. त्याच वेळी, भारताने 2023च्या फायनलमध्ये प्रवेश केला आणि यावेळी त्यांचा सामना ऑस्ट्रेलियाशी झाला. यावेळी कांगारूंनी भारताचा 209 धावांनी पराभव केला. आता यंदाचा फायनल सामना ऑस्ट्रेलिया आणि दक्षिण आफ्रिका यांच्यात होणार आहे.

2025च्या वर्ल्ड टेस्ट चॅम्पियनशिपसाठी बक्षीस वितरण..!

1) विजेता संघ 30.78 कोटी
2) उपविजेता संघ 18.46 कोटी
3) भारत 12.31 कोटी
4) न्यूझीलंड 10.26 कोटी
5) इंग्लंड 8.20 कोटी
6) श्रीलंका 7.18 कोटी
7) बांगलादेश 6.15 कोटी
8) वेस्ट इंडीज 5.13 कोटी
9) पाकिस्तान 4.10 कोटी