क्रिकेट विश्वात अनेक टी-२० क्रिकेट स्पर्धा खेळली जाते. यामध्ये इंडियन प्रीमियर लीगची भारतात सुरुवात झाल्यानंतर अनेक क्रिकेट देशांमध्ये टी-२० लीग स्पर्धा सुरू झाली आहे. आयपीएलच्या धर्तीवर कॅरिबियन प्रीमियर लीग कॅरेबियन बेटांमध्ये खेळली जाते. सीपीएल बर्याच वर्षांपासून खेळली जात आहे, ज्याचा यावर्षीचा हंगाम नुकताच संपन्न झाला.
यंदा कॅरिबियन प्रीमियर लीग २०२० च्या चॅम्पियनचा मान त्रिनबॅगो नाईट रायडर्स संघाने मिळविला. सीपीएलमध्ये बर्याच खेळाडूंनी उत्तम प्रदर्शन केले. त्यातील अनेक खेळाडूंवर आयपीएल संघांचीही नजर होती.
सीपीएलच्या या हंगामात खेळलेले बरेच खेळाडू आयपीएलच्या वेगवेगळ्या संघांकडून खेळत आहेत. सीपीएल २०२० मधील त्यांची कामगिरी पाहता यंदा आयपीएलमध्येही तशी कामगिरी करतील अशी त्यांच्या आयपीएल संघांची विशेष अपेक्षा असेल.
सीपीएलमध्ये चांगली कामगिरी करणाऱ्या या ५ खेळाडूंकडून आयपीएलमध्येही चांगल्या कामगिरीची अपेक्षा
शिमरॉन हेटमायर (Shimron Hetmeyer)
क्रिकेट मधील टी-२० स्वरूपात वेस्ट इंडिजच्या खेळाडूंनी जबरदस्त कामगिरी केली आहे. वेस्ट इंडिजच्या खेळाडूंमध्ये युवा फलंदाज शिमरॉन हेटमायरनेही टी-२० स्वरूपात जबरदस्त कामगिरी करून सर्वांचे लक्ष वेधून घेतलं आहे. शिमरॉन हेटमायरने त्याच्या सातत्यपूर्ण कामगिरीने आपला ठसा उमटविला आहे. या युवा कॅरेबियन फलंदाजाने आंतरराष्ट्रीय क्रिकेट तसेच टी-२० क्रिकेट लीगमध्येही चांगले काम केले आहे.
त्याने सीपीएलच्या या मोसमातही उत्कृष्ट कामगिरी केली होती. हेटमायर सीपीएल २०२० मध्ये गयाना अमेझॉन वॉरियर्सकडून खेळत होता. ज्यात त्याने ११ सामने खेळले आणि २६७ धावा केल्या. यंदा आयपीएलमध्ये तो दिल्ली कॅपिटल संघातून खेळताना दिसेल.
मोहम्मद नबी (Mohammed Nabi)
अफगाणिस्तान क्रिकेट संघाच्या खेळाडूंनी देखील आयपीएलमध्ये अप्रतिम खेळ दाखवला आहे. युवा रशिद खान आणि मुजीब व्यतिरिक्त अनुभवी खेळाडू मोहम्मद नबी याने अफगाणिस्तानसाठी चांगली कामगिरी केली आहे. मोहम्मद नबी हा अफगाणिस्तानचा माजी कर्णधार आहे. त्याने एका अष्टपैलू खेळाडूच्या रूपाने आपले नाव केले आहे.
सीपीएलच्या या मोसमात पुन्हा मोहम्मद नबीने आपले वर्चस्व दाखवले. गयाना अमेझॉन वॉरियर्सकडून खेळलेल्या नाबीने जबरदस्त अष्टपैलू कामगिरी बजावली आणि तेथे त्याने गोलंदाजीत १२ बळी घेऊन यशस्वी कामगिरी केली आणि फलंदाजीत त्याने १५६ धावा केल्या. या अष्टपैलू कामगिरीमुळे आयपीएल संघ सनरायझर्स हैदराबादलाही आशा आहे की तो येथे चांगली कामगिरी करेल.
मुजीब उर रहमान (Mujib Ur Rehman)
अफगाणिस्तान संघामध्ये रशीद खान या फिरकी गोलंदाजापाठोपाठच युवा फिरकी गोलंदाज मुजीब उर रेहमाननेही आपली ओळख सर्वांना करून दिली आहे. अफगाणिस्तान संघाव्यतिरिक्त मुजीब उर रहमान अनेक लीग क्रिकेट खेळतो.
नुकत्याच संपलेल्या सीपीएल २०२० मध्येही मुजीब उर रहमानने चमकदार कामगिरी बजावली. सीपीएलच्या जमैका तल्लावाहज संघासाठी या मोसमात मुजीब उर रहमानने १६ बळी घेतले. त्याने ६ पेक्षा कमी इकॉनोमी रेटने धावा खर्च केल्या. त्याच्या अशा कामगिरीने किंग्ज इलेव्हन पंजाब संघ नक्की आनंदी असेल. गेल्या दोन सत्रांत मुजीब किंग्ज इलेव्हन पंजाबकडून चांगली कामगिरी करत होता.
इम्रान ताहिर (Imran Tahir)
दक्षिण आफ्रिकेचा अनुभवी फिरकी गोलंदाज इम्रान ताहिरने गेल्या वर्षी आंतरराष्ट्रीय क्रिकेटमधून निवृत्ती घेतली आहे. परंतु त्याचे वय त्याच्या कार्यक्षमतेवर कोणताही परिणाम दर्शवित नाही. इम्रान ताहिरचे वय जसजसे वाढत आहे तसतसे त्याची कामगिरीही चांगली होत आहे.
इम्रान ताहिरने पुन्हा एकदा कॅरेबियन प्रीमियर लीगमध्ये चमकदार कामगिरी केली आहे. इम्रान ताहिरने या सीपीएल हंगामात ११ सामने खेळले असून ५.२९ च्या इकॉनोमीने १५ बळी घेतले आहेत. ताहिरच्या या कामगिरीमुळे आयपीएलमध्ये त्याचा संघ चेन्नई सुपर किंग्जच्या अपेक्षाही वाढल्या आहेत.
निकोलस पूरण (Nicholas Puran)
वेस्ट इंडीज क्रिकेट संघाचा युवा स्टार फलंदाज निकोलस पूरणने आपल्या कामगिरीने सर्वांचे लक्ष वेधले आहे. निकोलस पूरनने नुकताच वेस्ट इंडिज संघात खेळण्याव्यतिरिक्त कॅरेबियन प्रीमियर लीगमध्ये खेळला. निकोलस पुरणसाठी हा हंगाम चांगला होता. त्याने गयाना अमेझॉन वॉरियर्ससाठी जबरदस्त कामगिरी केली.
निकोलस पूरणने सीपीएल २०२० मध्ये आपल्या फलंदाजीने सर्वांना प्रभावित केले. त्याने या मोसमात १ शतक आणि १ अर्धशतकाच्या मदतीने २४५ धावा केल्या. त्याची कामगिरी पाहून त्याचा आयपीएल संघ किंग्ज इलेव्हन पंजाबच्या अपेक्षा नक्कीच वाढल्या असतील.
