कोरोना महामारीमुळे संपूर्ण जग ठप्प झाले होते. याचा सर्वात जास्त फटका क्रीडाविश्वाला बसला. दरवर्षी एप्रिल-मे यादरम्यान भरवली जाणारी जगातील सर्वोत्कृष्ट टी२० लीग असलेली आयपीएल देखील या कारणास्तव स्थगित केली होती. अखेरीस, ऑगस्टच्या पहिल्या आठवड्यात आयपीएलविषयी महत्वाची बातमी आली आणि आयपीएलचा हा तेरावा हंगाम युएईमध्ये बंद दाराआड खेळण्याचे निश्चित झाले.
दुबई, अबुधाबी आणि शारजाच्या मैदानांवर खेळल्या गेलेल्या ५६ साखळी सामन्यांतून व प्ले-ऑफच्या तीन सामन्यांच्या प्रतीक्षेनंतर मुंबई इंडियन्स आणि दिल्ली कॅपिटल्स हे दोन संघ अंतिम सामन्यासाठी पात्र ठरले. मुंबई एकूण सहाव्यांदा तर सलग दुसऱ्यांदा आयपीएलचा अंतिम सामना खेळत आहे. दुसरीकडे, दिल्ली कॅपिटल्स तेरा वर्षात पहिल्यांदाच अंतिम फेरीत जागा बनवण्यात यशस्वी ठरली. स्पर्धेतील सर्वात मजबूत संघ म्हणून पुढे आलेल्या मुंबई इंडियन्सला पराभूत करण्याचे, मोठे दिव्य दिल्लीच्या संघाला पार पाडावे लागणार आहे. याच अंतिम सामन्यापूर्वी अशा सहा रोचक गोष्टींविषयी आम्ही तुम्हाला सांगणार आहोत; ज्या कदाचित एक क्रिकेटप्रेमी म्हणून तुम्हाला माहीत हव्या.
१. सर्वात यशस्वी कर्णधार विरुद्ध सर्वात युवा कर्णधार
आज दुबईच्या मैदानावर ज्यावेळी मुंबई इंडियन्ससाठी रोहित शर्मा व दिल्ली कॅपिटल्ससाठी श्रेयस अय्यर नाणेफेक यासाठी उतरतील; तेव्हा आयपीएलच्या इतिहासातील सर्वात यशस्वी कर्णधार विरुद्ध आयपीएल इतिहासातील सर्वात युवा कर्णधार अशी लढत रंगेल. कारण, मुंबईने जी चार आयपीएल विजेतेपदे पटकावली आहेत; त्या चारही वेळी रोहित शर्मा मुंबईचा कर्णधार होता. तर दुसरीकडे, पंचवीस वर्षीय श्रेयस अय्यर अंतिम फेरीत कर्णधारपद सांभाळणारा सर्वात युवा कर्णधार ठरेल.
२. तीन वेळा साखळी सामन्यांत अव्वल असणाऱ्या संघाने जिंकली आयपीएल ट्रॉफी
आयपीएलच्या तेरा वर्षाच्या इतिहासात फक्त तीन वेळा साखळी फेरीत अव्वल स्थानावर राहिलेल्या संघाला आयपीएलच्या ट्रॉफीवर कब्जा करत आला आहे. आयपीएलच्या पहिल्या हंगामात म्हणजेच २००८ आयपीएलमध्ये राजस्थान रॉयल्सने सर्वप्रथम ही कामगिरी केली होती. त्यानंतर मुंबई इंडियन्सने अनुक्रमे २०१७ व २०१९ मध्ये साखळी फेरीत वर्चस्व गाजवल्यानंतर आयपीएलची ट्रॉफी उंचावली आहे.
३. ‘मुंबईकर’ श्रेयस उतरणार मुंबईविरुद्ध मैदानात
दिल्ली कॅपिटल्स कर्णधार श्रेयस अय्यर हा पहिला असा कर्णधार असेल; ज्याचा जन्म मुंबईत झाला आहे आणि तो मुंबईविरुद्धच अंतिम सामन्यात विरोधी संघाचे कर्णधारपद भूषवेल. यापूर्वी सचिन तेंडुलकर आणि रोहित शर्मा या मुंबईकरांनी आयपीएलच्या अंतिम सामन्यात कर्णधाराची भूमिका बजावली आहे. मात्र, हे दोघेही मुंबई इंडियन्सचेच कर्णधार राहिले आहेत.
४. आंतरराष्ट्रीय सामन्यांचा अनुभव नसताना पोहोचवले संघांना अंतिम सामन्यात
रोहित शर्मा व श्रेयस अय्यर हे दोन्ही असे कर्णधार आहेत; ज्यांनी आंतरराष्ट्रीय सामन्यात राष्ट्रीय संघाचे नेतृत्व न करता, आपापल्या आयपीएल संघांना आयपीएलच्या अंतिम फेरीत नेले आहे. रोहित शर्माने २०१३ आयपीएलवेळी प्रथमच मुंबई इंडियन्सचे नेतृत्व करत; मुंबईला अंतिम फेरीत नेले होते. तर, यावर्षी अशीच कामगिरी श्रेयस अय्यरने केली आहे.
५. श्रेयसच्या नावे जमा होऊ शकतो आयपीएलमधील विक्रम
आज श्रेयस अय्यर दुबईच्या मैदानावर नाणेफेकीसाठी उतरेल; त्यावेळी अंतिम सामन्यात कोणत्याही संघाचे नेतृत्व करणारा आयपीएलचा सर्वात युवा कर्णधार होण्याचा मान त्याला मिळेल. आयपीएलमध्ये कर्णधार म्हणून सर्वात कमी वयात विजेतेपद मिळवण्याची कामगिरी रोहित शर्माने केली होती. २०१३ मध्ये रोहित शर्माने २६ व्या वर्षी कर्णधार म्हणून आयपीएल ट्रॉफी जिंकली होती. आज २५ वर्षीय श्रेयसकडे तो विक्रम मोडण्याची नामी संधी आहे.
६. हे तीन ‘माजी आयपीएल विजेते’ आहेत दिल्लीच्या संघात सामील
दिल्ली कॅपिटल्स संघात असे तीन भारतीय खेळाडू समाविष्ट आहेत; जे यापूर्वी आयपीएल विजेतेपद पटकावणाऱ्या संघाचा भाग राहिले आहेत. रविचंद्रन आश्विन २०१० व २०११ अशी सलग दोन वर्ष चेन्नई सुपर किंग्सकडून, अक्षर पटेल २०१३ मध्ये मुंबई इंडियन्सकडून तर शिखर धवन २०१६ मध्ये उपकर्णधार या भूमिकेत सनरायझर्स हैदराबादकडून आयपीएल विजेता ठरला आहे.
महत्त्वाच्या बातम्या –
एकच नंबर! एकेवेळी दिल्ली गाजवलेला ‘हुकमी एक्का’ फायनलमध्ये दिल्लीला लोळवायला सज्ज
‘आम्हाला हलक्यात घेऊ नका’, दिल्लीच्या प्रशिक्षकाची मुंबईला चेतावणी
‘मुंबई गेली’, जोफ्रा आर्चरच्या सहा वर्षांपूर्वीच्या ट्विटने सोशल मीडियावर खळबळ
ट्रेंडिंग लेख –
विराट… ऑस्ट्रेलिया दौरा अर्ध्यातून सोडलास तरीही आम्हाला तुझा अभिमान वाटतोय
भावा तु संघात असलास की दिल्लीचे चाहते शेवटपर्यंत निवांत असतात; पाहा कोण आहेत दिल्लीचे संकटमोचक
प्रतिस्पर्ध्याला दिवसा चांदणं दाखवणारा दिल्लीचा हा पठ्ठ्या म्हणजे दिल्ली कॅपिटल्सची जान आहे जान !!