भारताकडून 15 वर्षांनंतर पुन्हा टी20 विश्वचषकात उतरणार ‘ही’ जोडी, एकटा जबरदस्त फॉर्मात

ऑक्टोबर-नोव्हेंबर महिन्यात ऑस्ट्रेलियात खेळल्या जाणाऱ्या टी20 विश्वचषक 2022 साठी सोमवारी (12 सप्टेंबर) 15 सदस्यीय भारतीय संघाची घोषणा करण्यात आली. या संघात दोन खेळाडू असे आहेत, जे 15 वर्षांपूर्वी झालेल्या टी20 विश्वचषकातही भारतीय संघाचा भाग होते. हे दोन खेळाडू आणखी कोण नसून, रोहित शर्मा आणि दिनेश कार्तिक हे आहेत. हे दोघे एकमेव अशी जोडी आहेत, जे 2007 नंतर पुन्हा एकदा भारताकडून एकत्र खेळताना दिसतील. 

2007 साली (T20 World Cup 2007) पहिल्यांदा टी20 विश्वचषक खेळला गेला होता. या विश्वचषकातून रोहितने (Rohit Sharma) टी20 क्रिकेटमध्ये पदार्पण केले होते. तर कार्तिक (Dinesh Karthik) त्याआधीपासूनच टी20 क्रिकेटमध्ये खेळत होता. त्याने 2006 साली दक्षिण आफ्रिकेविरुद्ध टी20 कारकिर्दीची सुरुवात केली होती. 2007 नंतर 2010 सालच्या टी20 विश्वचषकातही रोहित आणि कार्तिकची जोडी एकत्र खेळली होती. त्यानंतर आता 2022 मध्ये पुन्हा एकदा हे दोघे टी20 विश्वचषकात भारतीय संघाचे प्रतिनिधित्त्व करताना दिसतील.

2007च्या टी20 विश्वचषकात कार्तिक आणि रोहितबरोबर तत्कालिन कर्णधार एमएस धोनी, युवराज सिंग, अजित आगरकर, पियुष चावला, गौतम गंभीर, हरभजन सिंग, जोगिंदर शर्मा, युसूफ पठाण, इरफान पठाण, विरेंद्र सेहवाग, आरपी सिंग, एस श्रीसंत आणि रॉबिन उथप्पा हे होते. हे सर्व क्रिकेटपटू आता आंतरराष्ट्रीय क्रिकेटमधून निवृत्त झाले आहेत.