दक्षिण आफ्रिकेचा माजी कर्णधार फाफ डु प्लेसिसने गौतम गंभीरच्या तीव्र स्पर्धात्मक वृत्तीचे कौतुक केले आहे. तो म्हणाला की, याच गुणामुळे गंभीर अनेकदा ‘कथेचा खलनायक’ ठरला, परंतु हीच वृत्ती त्याच्या संघांसाठी सर्वात मोठे शस्त्र ठरली. डु प्लेसिसच्या मते, गंभीरच्या याच वैशिष्ट्यामुळे कोलकाता नाईट रायडर्स (KKR) सारख्या संघाला बळकटी मिळाली. गंभीरच्या नेतृत्वाखाली केकेआरने २०१२ आणि २०१४ मध्ये आयपीएलचे विजेतेपद पटकावले, तर मार्गदर्शक (मेंटॉर) म्हणून त्याच्या मार्गदर्शनाखाली हा संघ २०२४ मध्ये तिसऱ्यांदा चॅम्पियन बनला. आता प्रशिक्षक म्हणून त्याने भारतीय संघाला २०२५ ची आयसीसी चॅम्पियन्स ट्रॉफी आणि यावर्षीचा टी-२० विश्वचषक जिंकून दिला आहे.
डु प्लेसिसने ‘जिओ हॉटस्टार’शी बोलताना सांगितले की, “गंभीरबद्दलचा माझा दृष्टिकोन त्याच्यासोबत खेळणाऱ्या खेळाडूंपेक्षा वेगळा आहे. त्याच्या विरुद्ध खेळताना तो नेहमीच ‘कथेचा खलनायक’ असतो, पण तुम्ही त्याचा आदर करता. गंभीरची सर्वात मोठी खासियत म्हणजे तो अत्यंत स्पर्धात्मक आहे. कोणाला तो आवडतो की नाही, याची त्याला अजिबात पर्वा नसते. एक नेता म्हणून त्याचे काम उच्च मानके (standards) सेट करणे आणि ड्रेसिंग रूममध्ये जबाबदारी निश्चित करणे हे असते.” डु प्लेसिसच्या मते, गंभीर कोणत्याही ड्रेसिंग रूममध्ये उच्च दर्जाची शिस्त आणि उत्तरदायित्व निर्माण करतो, जे प्रतिस्पर्धी कर्णधारासाठी देखील प्रेरणेचे कारण ठरते.
तो पुढे म्हणाला, “एक कर्णधार म्हणून जेव्हा तुम्ही त्याच्या विरुद्ध खेळता, तेव्हा त्याच्या व्यक्तिमत्वामुळे तुम्हाला त्याला हरवावेसे वाटते, पण त्याच वेळी तो इतकी उच्च मानके स्थापित करतो याचा तुम्ही आदरही करता.” डु प्लेसिस म्हणाला, “चांगले कर्णधार हेच करतात आणि गंभीरने आपल्या कारकिर्दीच्या सुरुवातीपासूनच हे दाखवून दिले आहे. त्याच्या रेकॉर्डवर नजर टाकली तर मान्य करावे लागेल की, नेतृत्वाच्या दृष्टीने त्याच्या उपस्थितीत केकेआर हा एक बलाढ्य संघ होता.” रॉयल चॅलेंजर्स बेंगळुरूचे (RCB) नेतृत्व केलेल्या डु प्लेसिसने असेही नमूद केले की, फ्रँचायझी क्रिकेटमध्ये नेतृत्व हे केवळ कर्णधारापुरते मर्यादित नसते.
दक्षिण आफ्रिकेच्या माजी कर्णधाराने सांगितले की, “लोक जेव्हा एखाद्या संस्थेत किंवा संघात नेतृत्वाबद्दल बोलतात, तेव्हा ते फक्त कर्णधाराचा विचार करतात. हो, कर्णधाराची भूमिका महत्त्वाची असतेच, पण माझ्यासाठी याची सुरुवात सर्वोच्च स्तरापासून होते. यामध्ये फ्रँचायझी मालक, प्रशिक्षक आणि संघातील ‘लीडरशिप ग्रुप’चा समावेश असतो.” तो पुढे म्हणाला, “जेव्हा तुम्ही मुंबई इंडियन्स, चेन्नई सुपर किंग्स आणि केकेआर सारखे यशस्वी संघ पाहता, तेव्हा तिथे गौतमसोबत श्रेयस अय्यर किंवा (एमएस) धोनीसोबत (स्टीफन) फ्लेमिंग अशी समीकरणे दिसतात. अगदी गेल्या वर्षी आरसीबीमध्येही अँडी फ्लॉवर आणि मो बॉबट यांच्या रूपाने उच्च स्तरावर मजबूत नेतृत्व होते, तर कर्णधारासाठी (रजत पाटीदार) आयपीएलमधील नेतृत्वाचा हा पहिलाच अनुभव होता.”
