भारत आणि श्रीलंका येथे होणाऱ्या टी20 वर्ल्ड कप 2026 साठी सर्व संघांनी आपली तयारी पूर्ण केली आहे. भारताशिवाय दक्षिण आफ्रिकेनेही आगामी विश्वचषकासाठी आपला संघ जाहीर केला आहे. टी20 विश्वचषक 2026 हा 2024 च्या धर्तीवरच खेळवला जाईल, ज्यामध्ये 20 संघ सहभागी होतील. सर्व संघांची एकूण 4 गटांत विभागणी करण्यात आली आहे. आता टी20 विश्वचषक 2026 साठी नामिबियानेही आपला संघ घोषित केला आहे, ज्यामध्ये एका 30 वर्षीय खेळाडूवर मोठी जबाबदारी सोपवण्यात आली आहे.
आगामी टी20 विश्वचषक 2026 साठी नामिबियाने आपल्या 15 सदस्यीय संघाची घोषणा केली आहे. या संघात तरुण खेळाडूंसोबतच अनुभवी वरिष्ठ खेळाडूंचाही समावेश करण्यात आला आहे. संघाचे नेतृत्व 30 वर्षीय अष्टपैलू खेळाडू गेरहार्ड इरास्मस करणार आहे. बोर्डाने त्याच्यावर ही मोठी जबाबदारी सोपवली आहे. याशिवाय, अलेक्झांडर वोल्शेंकला राखीव खेळाडू म्हणून संघात स्थान मिळाले आहे. विशेष म्हणजे, नामिबिया सलग चौथ्यांदा या स्पर्धेत सहभागी होत आहे. नामिबियाचा समावेश भारत, पाकिस्तान, अमेरिका आणि नेदरलँड्ससह ग्रुप ‘ए’ मध्ये करण्यात आला आहे.
नामिबिया आपल्या मोहिमेची सुरुवात (10 फेब्रुवारी) रोजी अरुण जेटली स्टेडियमवर नेदरलँड्सविरुद्ध करेल. त्यानंतर 12 फेब्रुवारीला नामिबियाचा दुसरा सामना भारताविरुद्ध याच मैदानावर (अरुण जेटली स्टेडियम) होईल. 15 फेब्रुवारीला या संघाचा सामना अमेरिकेविरुद्ध चेन्नईत होणार आहे, तर 18 फेब्रुवारीला नामिबियाचा संघ कोलंबोमध्ये पाकिस्तानशी भिडणार आहे.
नामिबियाने आगामी टी20 विश्वचषक 2026 बाबत सोशल मीडियावर लिहिले आहे की, “आमचा संघ भारत आणि श्रीलंका येथे होणाऱ्या आयसीसी पुरुष टी20 विश्वचषकासाठी सज्ज आहे. जागतिक स्तरावर नामिबियाचा ध्वज फडकवण्यासाठी सज्ज असलेल्या संघ आणि व्यवस्थापनाला खूप खूप शुभेच्छा. चाहत्यांनो, तयार राहा! खेळाडूंना पाठिंबा देण्यासाठी ट्रॅव्हल पॅकेजेस लवकरच जाहीर केले जातील.”
