आयपीएल 2025 मध्ये शुक्रवारी खेळल्या गेलेल्या सामन्यात पंजाब किंग्जने रॉयल चॅलेंजर्स बंगळुरूचा पराभव केला. आरसीबीला त्यांच्या घरच्या मैदानावर आणखी एक पराभव पत्करावा लागला. या हंगामात संघाने त्यांच्या घरच्या मैदानावर चिन्नास्वामी येथे एकही सामना जिंकलेला नाही. आरसीबीच्या या पराभवानंतरही त्यांचा स्फोटक फलंदाज टिम डेव्हिडने एक मोठा विक्रम केला आहे. त्याच्या नावावर एक असा विक्रम आहे जो आतापर्यंत आयपीएल 2025 मध्ये इतर कोणत्याही फलंदाजाला करता आला नाही.
पावसामुळे सामना 14-14 षटकांचा करण्यात आला. बेंगळुरूमध्ये झालेल्या या सामन्यात, आरसीबी संघाने प्रथम फलंदाजी करत निर्धारित 14 षटकांत 9 बाद 95 धावा केल्या. प्रत्युत्तरात पंजाबने 13व्या षटकात पाच विकेट गमावून हे लक्ष्य गाठले. या स्पर्धेत पंजाबचा हा पाचवा विजय होता. जरी पंजाबने हा सामना जिंकला तरी सामनावीराचा किताब टिम डेव्हिडला मिळाला.
TIM DAVID BECOMES THE FIRST PLAYER TO WIN POTM AWARD AFTER LOSING IN IPL 2025. 🤯👏
— Mufaddal Vohra (@mufaddal_vohra) April 18, 2025
– The heroics of David. 🙇♂️ pic.twitter.com/H71J9UMXNk
या सामन्यात टिम डेव्हिडने फक्त 26 चेंडूत 5 चौकार आणि 3 षटकारांसह 50 धावांची धमाकेदार खेळी केली. यामुळे, आरसीबी संघ आव्हानात्मक धावसंख्या करण्यात यशस्वी झाला. जर टिम डेव्हिड नसता तर आरसीबीला एवढी मोठी धावसंख्या उभारता आली नसती. याच कारणामुळे या सामन्यात आरसीबीचा पराभव झाला तरी टिम डेव्हिडला सामनावीराचा पुरस्कार देण्यात आला. आता टिम डेव्हिड आयपीएल 2025 मध्ये ही कामगिरी करणारा पहिला खेळाडू बनला आहे.
आरसीबीने या हंगामात 7 सामने खेळले आहेत, त्यापैकी 4 सामने जिंकले आहेत आणि 3 सामने गमावले आहेत. हा संघ सध्या आठ गुणांसह गुणतालिकेत चौथ्या स्थानावर आहे. जर आरसीबीला हंगामाच्या प्लेऑफमध्ये स्थान मिळवायचे असेल तर त्यांना केवळ घराबाहेरच नव्हे तर चिन्नास्वामीमध्येही सामने जिंकावे लागतील. या हंगामात या मैदानावर संघाचा रेकॉर्ड खूपच खराब राहिला आहे.
