भारत-न्यूझीलंड ऐतिहासिक लढतीनंतर टीम पेनने चाहत्यांनी मागितली क्षमा, पाहा काय आहे प्रकरण

ऑगस्ट २०१९ पासून सुरू झालेल्या जागतिक कसोटी अजिंक्यपद स्पर्धेचा काही दिवसांपुर्वी शेवट झाला. एजेस बाउल स्टेडियमवर भारत विरुद्ध न्यूझीलंड यांच्यात या स्पर्धेचा अंतिम सामना पार पडला. न्यूझीलंडने राखीव दिवशी (२३ जून) ८ विकेट्स राखून सामन्यासह जेतेपदावरही नाव कोरले. परंतु विराट कोहलीच्या नेतृत्त्वाखालील भारतीय संघाच्या हाती मात्र निराशा आली. भारताच्या पराभवानंतर ऑस्ट्रेलियाच्या कसोटी संघाचा कर्णधार टिम पेन याने आपल्या एका कृतीबद्दल क्षमा मागितली आहे.

त्याचे झाले असे की, कसोटी अजिंक्यपद अंतिम सामन्यापुर्वी टीम पेनने या ऐतिहासिक सामन्याच्या विजेत्या संघाबद्दल भविष्यवाणी केली होती. “विराट आणि त्याचा संघ न्यूझीलंडला सहज पराभूत करत पहिलीवहिली कसोटी अजिंक्यपद स्पर्धा जिंकेल. ते बिनशर्त त्यांचे सर्वोत्कृष्ट देतील,” असे त्याने म्हटले होते. परंतु आता त्याची भविष्यवाणी चुकीची ठरल्याने त्याने सर्वांची क्षमा मागितली आहे.

न्यूजटॉक झेडबीशी बोलताना टीम पेन म्हणाला की, “आपण सर्वजणच कधी-कधी चूकीचे ठरत असतो. कसोटी अजिंक्यपद अंतिम सामन्यात न्यूझीलंडने भारताला धूळ चारल्यानंतर न्यूझीलंडच्या चाहत्यांनी मला फैलावर घेतले. त्यामुळे मी विचार केला की, आपण ऑन एयर जाऊन त्यांची क्षमा मागावी. न्यूझीलंड संघाने अंतिम सामन्यात अतिशय दमदार प्रदर्शन केले आहे. त्यांना असे खेळताना पाहणे नेहमीच शानदार असते. त्यांनी आंतरराष्ट्रीय पातळीवर जे काही केले आहे, त्याचा मी सन्मान करतो.”