विजय क्लब, गोलफादेवी मंडळ, दुर्गामाता स्पोर्ट्स, अमर भारत मंडळ यांनी वंदे मातरम् क्रीडा मंडळाने आपल्या “सुवर्ण महोत्सवी वर्षानिमित्त” आयोजित केलेल्या प्रथम श्रेणी स्थानिक पुरुषात उपांत्य फेरीत धडक दिली.विजय क्लब विरुद्ध गोलफादेवी आणि दुर्गामाता विरुद्ध अमर भारत अशा उपांत्य लढती होतील.या स्पर्धेतील संभाव्य विजेता म्हणून विजय क्लबकडे पहिले जात आहे. विजय क्लब विरुद्ध अमर भारत अशी अंतिम लढत होईल असा कबड्डी जाणकारांचा होरा आहे.
आहता प्रॉडक्शन पुरस्कृत नायगाव भोईवाडा येथील सदाकांत ढवण मैदानात सुरू असलेल्या पहिल्या उपांत्यपूर्व सामन्यात दादरच्या विजय क्लबने काळाचौकीच्या अमर क्रीडा मंडळाला २८-२२असे नमवित उपांत्य फेरी गाठली.मध्यांतराला १६-१०अशी आघाडी घेणाऱ्या विजय क्लबने मध्यांतरानंतर सावध खेळ करीत ही आघाडी आपल्या हातून निसटणार नाही याची पुरेपूर काळजी घेत हा विजय मिळविला.शुभम वर्मा,रोशन थापा, श्री भारती या विजयाचे शिल्पकार ठरले. अमर कडून सुशांत किरुळकर, नितीन विचारे यांनी संघाचा पराभव टाळण्याचा शर्थीचा प्रयत्न केला. पण त्यात ते अपयशी ठरले.
दुसऱ्या सामन्यात वरळी कोळीवाड्याच्या गोलफादेवी मंडळाने ना म जोशी मार्गच्या शिवशक्तीचा दुबळा प्रतिकार २२-१३असा मोडून काढला. अक्षय बिडू, धनंजय सरोज, कल्पेश कडू यांनी दोन्ही डावात वर्चस्व राखत गोलफादेवीचा हा विजय सोपा केला. शिवशक्तीच्या दीपक शिंदे, मकरंद मसुरकर यांचा प्रतिकार दुबळा ठरला. परळच्या दुर्गामाता स्पोर्ट्सने ना म जोशी मार्गच्या जय भारत मंडळा ३९-१४असे सहज लोळविले. पहिल्या डावात १५- ०९अशी आघाडी घेणाऱ्या दुर्गामाताने दुसऱ्या डावात आणखी जोरदार आक्रमण करीत २५गुणांच्या मोठ्या फरकाने हा विजय साजरा केला.
प्रथमेश पालांडे, रुपेश माहूरे, करण कदम यांच्या चतुरस्त्र व आक्रमक खेळाला या विजयाचे श्रेय जाते. जय भारतच्या सिद्धेश सावंत, ओमकार मोरे यांची आज मात्रा चालली नाही. शेवटच्या सामन्यात अमर भारत संघाने विजय बजरंग व्यायाम शाळेचा ४०-२०असा पाडाव केला. विश्रांतीला २६-०९अशी भक्कम आघाडी अमर भारतकडे होती. मयूर शिवतरकर, प्रसाद कोळी, रोहीत शिवतरकर या सामन्यात चमकले. विजय बजरंगच्या अरुण सावंत, आकाश निकम यांच्या खेळात दम नव्हता.