क्रिकेटचा किंग मानला जाणारा विराट कोहली आपल्या कारकिर्दीच्या अशा टप्प्यावर आहे, जिथे तो जेव्हा जेव्हा मैदानात उतरतो, तेव्हा कोणताही ना कोणताही विक्रम आपल्या नावावर करतो. असेच काहीसे दृश्य न्यूझीलंडविरुद्धच्या दुसऱ्या वनडे सामन्यात पाहायला मिळाले. कोहली या डावात केवळ 23 धावा करून पॅव्हेलियनमध्ये परतला, परंतु त्यासोबतच त्याने महान सचिन तेंडुलकरचा विक्रम मोडीत काढला. न्यूझीलंडविरुद्ध कोहली नेहमीच धावांचा पाऊस पाडतो.
न्यूझीलंडविरुद्धच्या दुसऱ्या वनडे सामन्यात अवघी 1 धाव पूर्ण करताच विराट कोहलीने सचिन तेंडुलकरला मागे टाकले. न्यूझीलंडविरुद्ध वनडेमध्ये भारतीय म्हणून सर्वाधिक धावा करण्याचा विक्रम आतापर्यंत सचिन तेंडुलकरच्या नावावर होता. सचिनने या संघाविरुद्ध वनडेत 1750 धावा केल्या होत्या. हा विक्रम मागे टाकत विराट कोहलीने आता किवी संघाविरुद्ध 1773 धावा केल्या आहेत. दरम्यान, न्यूझीलंडविरुद्ध सर्वाधिक धावा करण्याचा विक्रम ऑस्ट्रेलियाचा माजी खेळाडू रिकी पाँटिंगच्या नावावर आहे. पाँटिंगने या संघाविरुद्ध 1971 धावा केल्या आहेत. आता कोहली त्यालाही मागे टाकण्याचा पूर्ण प्रयत्न करेल. किंग कोहली आता फक्त वनडे फॉरमॅट खेळताना दिसतो.
टॉस गमावल्यानंतर प्रथम फलंदाजीला उतरलेल्या टीम इंडियाला चांगली सुरुवात मिळाली. त्यानंतर माजी कर्णधार रोहित शर्मा केवळ 24 धावा करून बाद झाला. तर कर्णधार शुबमन गिलने 56 धावांची खेळी केली. कोहली व्यतिरिक्त उपकर्णधार श्रेयस अय्यरने केवळ 8 धावा केल्या. यामुळेच हे वृत्त लिहेपर्यंत टीम इंडियाने 28 षटकांत 4 गडी गमावून 135 धावा केल्या होत्या. सध्या टीम इंडियासाठी रवींद्र जडेजा आणि यष्टीरक्षक फलंदाज केएल राहुल मैदानात उपस्थित आहेत.
