येत्या 2026 च्या टी-20 वर्ल्ड कपसाठी बीसीसीआय (BCCI) सचिव देवजीत सैकिया यांनी टीम इंडियाची घोषणा केली, तेव्हा त्यात शुबमन गिलचे नाव कुठेही नव्हते. यामुळे हे स्पष्ट झाले आहे की, भारताच्या कसोटी आणि एकदिवसीय (ODI) संघाचा कर्णधार शुबमन गिल पुढील वर्षी होणाऱ्या टी20 वर्ल्ड कपमध्ये खेळणार नाही. दरम्यान, एक धक्कादायक माहिती समोर आली आहे की, टी20 संघातून वगळण्याबाबत शुबमन गिलला कोणतीही पूर्वकल्पना किंवा माहिती देण्यात आली नव्हती.
एका अहवालानुसार, बीसीसीआय (BCCI) च्या सूत्राने माहिती दिली आहे की, मुख्य निवडकर्ते अजित आगरकर, मुख्य प्रशिक्षक गौतम गंभीर आणि कर्णधार सूर्यकुमार यादव यांपैकी कोणीही शुभमन गिलशी यासंदर्भात चर्चा केली नव्हती की त्याला संघातून बाहेर काढले जात आहे. दुसरीकडे, कर्णधार सूर्यकुमार यादव देखील खराब फॉर्ममधून जात होता, परंतु त्याचे कर्णधारपद किमान वर्ल्ड कपपर्यंत कायम राहणार आहे. अहवालात असेही नमूद करण्यात आले आहे की, दक्षिण आफ्रिकेविरुद्धच्या टी20 मालिकेदरम्यान जेव्हा शुबमन गिलच्या पायाला दुखापत झाली, तेव्हापासूनच अशा बातम्या येऊ लागल्या होत्या की गौतम गंभीर आणि सूर्यकुमार यादव यांच्यासह संघ व्यवस्थापन गिलच्या पलीकडे इतर पर्यायांचा विचार करू लागले आहे. असेही सांगितले जात आहे की, गिलला अहमदाबादमध्ये झालेला पाचवा टी20 सामना खेळायचा होता, परंतु सूत्रांनुसार त्याआधीच संघ व्यवस्थापनाने त्याला संघातून बाहेर काढण्याची योजना आखली होती. याचा अर्थ, गिलला कोणतीही कल्पना न देता त्याला संघातून वगळण्यात आले
शुबमन गिलच्या दुखापतीबाबत असा कयास लावला जात होता की कदाचित त्याला फ्रॅक्चर झाले आहे, परंतु वैद्यकीय पथकाने (Medical Team) तपासणीअंती स्पष्ट केले की गिलची दुखापत फारशी गंभीर नव्हती. अशा परिस्थितीत, तो दक्षिण आफ्रिकेविरुद्धचा पाचवा टी20 सामना खेळू शकला असता. पत्रकार परिषदेतही असे दिसून आले की, मुख्य निवडकर्ते अजित आगरकर यांनी गिलला संघातून वगळण्याबाबत कोणतेही स्पष्ट उत्तर दिले नव्हते.
