WCL 2025 मध्ये, दिवसाचा दुसरा सामना 23 जुलै रोजी नॉटिंगहॅम येथील मैदानावर इंडिया चॅम्पियन्स विरुद्ध साउथ आफ्रिका चॅम्पियन्स यांच्यात खेळवण्यात आला. पावसामुळे व्यत्यय आलेल्या या सामन्यात दक्षिण आफ्रिकेने 88 धावांनी मोठा विजय मिळवला. या सामन्यात इंडिया चॅम्पियन्सचा कर्णधार युवराज सिंगने नाणेफेक जिंकून प्रथम गोलंदाजी करण्याचा निर्णय घेतला. प्रथम फलंदाजी करताना दक्षिण आफ्रिका चॅम्पियन्स संघाने 20 षटकांत 6 गडी गमावून 208 धावा केल्या. प्रत्युत्तरात इंडिया चॅम्पियन्स संघाला 18.2 षटकांत 9 गडी गमावून केवळ 111 धावा करता आल्या. या स्पर्धेत दक्षिण आफ्रिका चॅम्पियन्सचा हा सलग दुसरा विजय आहे.
इंडिया चॅम्पियन्सने नाणेफेक जिंकून प्रथम गोलंदाजी करण्याचा निर्णय घेतला. प्रथम फलंदाजी करताना दक्षिण आफ्रिकेचे सलामीवीर हाशिम अमला आणि जॅक रुडोल्फ यांनी वादळी सुरुवात केली. 4.2 षटकांत दोघांमध्ये पहिल्या विकेटसाठी 35 धावांची भागीदारी झाली. पियुष चावलाने हाशिम अमलाला (22) बाद करून दक्षिण आफ्रिकेला पहिला धक्का दिला. रुडोल्फने 20 चेंडूत 24 धावा काढल्या. तो धावबाद झाला. एका क्षणी दक्षिण आफ्रिकेचा डाव डळमळीत होत चालला होता. पण शेवटी कर्णधार एबी डिव्हिलियर्सने 30 चेंडूत 3 चौकार आणि 4 षटकारांच्या मदतीने 63 धावा केल्या. शिवाय जेजे स्मट्सने 17 चेंडूत 30 धावांचे योगदान दिले. यष्टीरक्षक मॉर्न व्हॅन विकने 5 चेंडूत नाबाद 18 धावा केल्या. त्याने 360 च्या स्ट्राईक रेटने धावा काढल्या आणि दक्षिण आफ्रिका चॅम्पियन्सना 208 च्या धावसंख्येपर्यंत पोहोचवले. गोलंदाजीबद्दल बोलायचे झाले तर, भारताकडून पियुष चावला आणि युसूफ पठाण यांनी 2-2 बळी घेतले.
लक्ष्याचा पाठलाग करताना इंडिया चॅम्पियन्सची सुरुवात खूपच खराब झाली. सलामीवीर शिखर धवन 1 धाव काढून बाद झाला. त्याचा साथीदार रॉबिन उथप्पा 2 धावा काढून बाद झाला. तिसऱ्या क्रमांकावर फलंदाजीसाठी आलेला सुरेश रैना 11 चेंडूत 16 धावा काढून बाद झाला. अंबाती रायुडू खाते न उघडताच पॅव्हेलियनमध्ये परतला. युसूफ पठाणच्या रूपात भारताला पाचवा धक्का बसला, तो 5 धावा काढून बाद झाला. तो बाद झाल्यानंतर पावसामुळे खेळ थांबवावा लागला.
सुमारे अर्ध्या तासानंतर खेळ पुन्हा सुरू झाला. पण त्यानंतरही इंडिया चॅम्पियन्स संघाचे सतत विकेट पडत राहिले. संघाचा कोणताही फलंदाज स्थिर खेळू शकला नाही. स्टुअर्ट बिन्नी संघाचा सर्वाधिक धावा करणारा फलंदाज ठरला. तो 39 चेंडूत 37 धावा काढून बाद झाला. इंडिया चॅम्पियन्स संघाला 18.2 षटकांत 9 गडी गमावून 111 धावा करता आल्या. शेवटी त्यांना 88 धावांनी पराभव स्वीकारावा लागला. इंडिया चॅम्पियन्सचा कर्णधार युवराज सिंग या सामन्यात फलंदाजीला आला नाही.
