मोहम्मद रिझवानच्या नेतृत्वाखालील पाकिस्तान क्रिकेट संघाला रविवारी रात्री 10 ऑगस्ट रोजी झालेल्या दुसऱ्या एकदिवसीय सामन्यात वेस्ट इंडिजकडून 5 विकेटने पराभव पत्करावा लागला. त्रिनिदादमधील ब्रायन लारा स्टेडियमवर वेस्ट इंडिज विरुद्ध पाकिस्तान दुसरा एकदिवसीय सामना खेळला गेला. या सामन्यात पावसाने लपंडाव केला. प्रथम फलंदाजी करताना पाकिस्तानने 37 षटकांत 7 विकेट गमावून 171 धावा केल्या. एकाही फलंदाजाला 40 धावांचा टप्पा गाठता आला नाही, बाबर आझम आणि मोहम्मद रिझवान सारख्या ज्येष्ठ खेळाडूंनीही निराशा केली. पावसामुळे लक्ष्य बदलण्यात आले आणि यजमानांना 35 षटकांत 181 धावांचे लक्ष्य मिळाले. वेस्ट इंडिजने 5 विकेट शिल्लक असताना 33.2 षटकांत ही धावसंख्या गाठली आणि मालिका 1-1 अशी बरोबरीत आणली.
यासह, वेस्ट इंडिजने पाकिस्तानविरुद्धच्या एकदिवसीय क्रिकेटमधील विजयाचा दुष्काळ संपवण्यात यश मिळवले. यजमानांनी 2263 दिवसांच्या दीर्घ अंतरानंतर एकदिवसीय सामन्यात पाकिस्तानचा पराभव केला आहे. 31 मे 2019 रोजी वेस्ट इंडिजने पाकिस्तानविरुद्धचा शेवटचा एकदिवसीय सामना जिंकला, तो विश्वचषक सामना होता.
नाणेफेक गमावल्यानंतर आणि प्रथम फलंदाजी केल्यानंतर, पाकिस्तानच्या संघाची सुरुवात चांगली झाली. 9व्या षटकात त्यांना सॅम अयुबच्या रूपात पहिला धक्का बसला, त्यानंतर संघाची घसरगुंडी उडाली. लवकरच पाकिस्तानची धावसंख्या 88 धावांवर 4 आणि 114 धावांवर 5 अशी झाली. या दरम्यान, बाबर आझमला खातेही उघडता आले नाही, तर कर्णधार मोहम्मद रिझवान 38 चेंडूत फक्त 16 धावा करू शकला.
वेस्ट इंडिजसाठीही या धावसंख्येचा पाठलाग करणे सोपे नव्हते. सलामीवीर लवकर बाद झाल्यानंतर, मधल्या फळीने धावा काढण्याची जबाबदारी घेतली. शाई होपने 32, शेरफेन रुदरफोर्डने 45 आणि रोस्टन चेसने 49 धावांची नाबाद खेळी करत संघाला विजय मिळवून दिला.
वेस्ट इंडिज विरुद्ध पाकिस्तान एकदिवसीय मालिकेतील तिसरा आणि निर्णायक सामना 12 ऑगस्ट रोजी याच मैदानावर खेळवला जाणार आहे.
