टी-२० वर्ल्ड कप २०२६ चे जेतेपद टीम इंडियाने आपल्या नावावर केले. भारताला तिसऱ्यांदा टी-२० वर्ल्ड चॅम्पियन बनवण्यात संजू सॅमसनचा मोठा वाटा होता. त्याने शेवटच्या तीन सामन्यांमध्ये धडाकेबाज खेळी केली, ज्यामुळे संघाला विजय मिळवण्यास मदत झाली. याच कारणामुळे संजू ‘प्लेअर ऑफ द टूर्नामेंट’ देखील ठरला. संजू सुरुवातीला प्लेइंग ११ चा भाग नव्हता. त्याला झिम्बाब्वेविरुद्धच्या सामन्यात संधी मिळाली आणि त्यानंतर त्याने मागे वळून पाहिले नाही. आता मुख्य प्रशिक्षक गौतम गंभीर यांनी संजूला अचानक संघात सामील करण्यामागचे कारण सांगितले आहे.
गौतम गंभीरने नुकत्याच ‘जिओस्टार’च्या एका शोमध्ये वर्ल्ड कपच्या मध्यातच ओपनिंग कॉम्बिनेशन बदलण्याबाबत भाष्य केले. गंभीरने सांगितले की, त्याला पॉवरप्लेमध्ये आक्रमकता आणायची होती आणि याच कारणास्तव त्याने संजूला प्लेइंग ११ मध्ये स्थान दिले. तो म्हणाला, ‘अनेक लोक म्हणतील की आम्ही टॉप ३ मध्ये डाव्या हाताच्या फलंदाजांमुळे संजू सॅमसनला जागा दिली, पण हे कारण नव्हते. आम्ही गेल्या दीड वर्षात नेहमीच वेगवान फलंदाजी करण्यावर लक्ष केंद्रित केले आहे. संजूला केवळ ऑफ-स्पिन गोलंदाजीचा सामना करण्यासाठी आणले नव्हते.’
गौतम गंभीर पुढे म्हणाला, ‘एक चांगला फलंदाज सर्व प्रकारच्या चेंडूंचा सामना करू शकतो. आम्हाला पहिल्या सहा ओव्हरमध्ये अधिक आक्रमकपणे खेळायचे होते. संजू सॅमसन काय करू शकतो हे आम्हाला ठाऊक आहे. त्याच्या क्षमतेवर कोणालाही शंका नव्हती. जर तो चांगला खेळला, तर पहिल्या सहा ओव्हरमध्येच सामन्याचे चित्र बदलू शकतो.’
संवादादरम्यान गंभीरने हे देखील सांगितले की, जिम सेशनदरम्यानच त्याने संजूला झिम्बाब्वेविरुद्ध खेळण्याची बातमी दिली होती. तो म्हणाला, ‘मी त्याला जिममध्ये याबद्दल सांगितले. आम्ही एकत्र सराव करत होतो आणि मी त्याला म्हटले की तू झिम्बाब्वेविरुद्ध खेळणार आहेस. त्यावर त्याने “मी तयार आहे” असे उत्तर दिले. आम्ही अशाच प्रकारे संवाद साधतो. हे केवळ मुख्य प्रशिक्षक आणि खेळाडूचे नाते नाही, तर हे असे नाते आहे जिथे बहुतेक गोष्टी सराव सत्रादरम्यानच स्पष्ट होतात.’
