टीम इंडियाने 2025 च्या वर्ल्ड कप फायनलमध्ये दक्षिण आफ्रिकेचा पराभव केला. यासोबतच भारतीय महिला संघाने आपला पहिला आयसीसी खिताब जिंकला. दक्षिण आफ्रिकेसमोर 299 धावांचे लक्ष्य होते आणि एक वेळ अशी आली की त्यांनी जोरदार सुरुवात केली होती. 20 षटकांत त्यांनी 114 धावा केल्या होत्या. लौरा वोल्वार्ड्ट आणि सुन लूस यांच्यात उत्तम भागीदारी रंगली होती. त्याच वेळी शेफाली वर्माला गोलंदाजीची संधी देण्यात आली आणि तिने ही महत्त्वाची भागीदारी तोडली. इथूनच सामना पलटला आणि टीम इंडिया 52 धावांनी विजयी ठरली. त्यानंतर भारतीय कर्णधार हरमनप्रीत कौरने सांगितले की संघाचे नशीब कसे पालटले.
फायनल जिंकल्यानंतर हरमनप्रीत कौरने प्रेझेंटेशनदरम्यान सांगितले की अचानक तिला शेफाली वर्माला ओव्हर देण्याचा विचार आला. शेफाली वर्माने केवळ फलंदाजीत 87 धावा केल्या नाहीत, तर गोलंदाजीतही 2 बळी घेतले. हरमनप्रीत म्हणाली, “जेव्हा लौरा वोल्वार्ड्ट आणि सुन लूस फलंदाजी करत होत्या, तेव्हा त्या खूप छान खेळत होत्या. मी शेफालीला तिथे उभी पाहिली आणि ज्या पद्धतीने ती फलंदाजी करत होती, त्यावरून मला जाणवले की आजचा दिवस तिचाच आहे.”
ती पुढे म्हणाली, “मला वाटले की मला माझ्या मनाच्या भावनेनुसार निर्णय घ्यायला हवा. माझे मन सांगत होते की तिला किमान एक ओव्हर तरी द्यावी. आणि हाच क्षण आमच्यासाठी सामना फिरवणारा ठरला. जेव्हा ती संघात आली होती, तेव्हा आम्ही तिला सांगितले होते की कदाचित आम्हाला तुझ्याकडून 2-3 षटकांची गरज भासेल. त्यावर ती म्हणाली होती. ‘जर तुम्ही मला चेंडू दिलात, तर मी 10 षटकेसुद्धा टाकीन.’
दरम्यान हरमनप्रीत कौरने चाहत्यांचेही आभार मानले. ती म्हणाली, “मी या प्रेक्षकांसाठी भाग्यवान आहे. त्यांनी अप्रतिम साथ दिली. आमच्यासोबत चढ-उताराच्या काळातही उभे राहिल्याबद्दल धन्यवाद. जरी आम्ही सलग तीन सामने गमावले होते, तरी मागील सामन्यानंतर आम्ही स्वतःवर विश्वास ठेवण्याबद्दल चर्चा केली होती.”
